ایگزیکٹو کمیٹی آف نیشنل اکنامک کونسل (ایکنیک) نے گلگت بلتستان میں 100 میگاواٹ سولر پلانٹ کے منصوبے کی منظوری دے دی، جس پر 24 ہزار 957 ملین روپے لاگت آئے گی اور اسے تین سال میں مکمل کیا جائے گا۔
وزیراعظم آفس کے مطابق یہ منصوبہ وزیر اعظم شہباز شریف کے حالیہ دورۂ گلگت بلتستان کے دوران عوام سے کیے گئے وعدے کی تکمیل ہے۔ ایکنیک کی منظوری کے بعد منصوبے پر کام کا باضابطہ آغاز ہو جائے گا، جبکہ سینٹرل ڈیولپمنٹ ورکنگ پارٹی پہلے ہی اس کی منظوری دے چکی ہے۔ منصوبے سے استور، داریل، تنگیر، دیامر، گھانچے، غذر، گلگت، ہنزہ، اشکومن، نگر، روندو، اسکردو اور شگر کے اضلاع مستفید ہوں گے۔ پہلے مرحلے میں اسکردو کو 18.958 میگاواٹ، دوسرے مرحلے میں ہنزہ کو 6، گلگت کو 28 اور دیامر کو 13.12 میگاواٹ بجلی فراہم کی جائے گی۔ تیسرے مرحلے میں بقیہ اضلاع کو 16.096 میگاواٹ بجلی ملے گی۔
مزید برآں، اسپتالوں اور سرکاری دفاتر کو آف دی گرڈ 18.162 میگاواٹ بجلی فراہم کی جائے گی، جس سے علاقے میں توانائی کی ضروریات کو مؤثر انداز میں پورا کیا جا سکے گا۔
تازہ ترین خبروں کے لیے پی این آئی کا فیس بک پیج فالو کریں
