کوئٹہ کی عدالت میں سنجیدی ڈیگاری کے علاقے میں خاتون اور مرد کے قتل کیس کی سماعت ہوئی، جہاں جوڈیشل مجسٹریٹ نے مقتول خاتون کی قبر کشائی کا حکم دے دیا۔ عدالتی حکم پر مجسٹریٹ کی موجودگی میں ڈیگاری کے علاقے میں قبر کشائی کا عمل جاری ہے۔
قتل کے واقعے میں گرفتار ملزم سردار شیرباز خان کو عدالت میں پیش کیا گیا، جہاں عدالت نے اسے ایک روزہ جسمانی ریمانڈ پر سیریس کرائم انوسٹی گیشن ونگ کے حوالے کر دیا۔ واضح رہے کہ گزشتہ روز بلوچستان میں خاتون اور مرد کے بہیمانہ قتل کی ویڈیو سوشل میڈیا پر وائرل ہوئی تھی، جس میں مسلح افراد ایک نامعلوم مقام پر دونوں کو اندھا دھند فائرنگ کر کے قتل کرتے دکھائی دے رہے تھے۔
ترجمان بلوچستان حکومت کے مطابق وزیراعلیٰ میر سرفراز بگٹی نے ویڈیو کا نوٹس لیتے ہوئے تحقیقات کا حکم دیا تھا۔ سرکاری ترجمان شاہد رند کا کہنا ہے کہ ابتدائی اطلاعات کے مطابق واقعہ عیدالاضحیٰ کے قریب پیش آیا، جبکہ مقتولین کی لاشیں تاحال برآمد نہیں ہو سکیں۔ پولیس اور سی ٹی ڈی کی ٹیمیں علاقے میں موجود ہیں اور تحقیقات جاری ہیں۔
تازہ ترین خبروں کے لیے پی این آئی کا فیس بک پیج فالو کریں
