پنجاب حکومت نے فروری میں تین روزہ بسنت منانے کی شرائط کے ساتھ اجازت دی تھی، اور اب انتظامیہ نے ایک بڑی پابندی ختم کر دی ہے۔
پنجاب حکومت نے 6 سے 8 فروری تک لاہور میں بسنت منانے کی مشروط اجازت دی تھی اور اس تہوار کے لیے متعدد پابندیاں عائد کی تھیں۔ تاہم اب ڈپٹی کمشنر لاہور کیپٹن (ر) محمد علی اعجاز نے بسنت کے لیے ضلع لاہور اور صوبہ پنجاب کی حدود کے باہر سے پتنگ بازی کا سامان لانے کی مشروط اجازت دے دی ہے۔
ضلع انتظامیہ نے یہ فیصلہ بسنت کے موقع پر پتنگ بازی کا سامان مہنگا ہونے کے خدشے کے پیش نظر کیا ہے، اور ڈی سی لاہور نے طلب اور رسد میں توازن برقرار رکھنے کے لیے اس حوالے سے حکم جاری کر دیا ہے۔
حکم نامے کے مطابق صرف رجسٹرڈ تاجروں کو ہی پتنگ بازی کے سامان کی کاروباری مشروط اور قانونی اجازت دی گئی ہے۔ ای بیز پورٹل کے ذریعے تاجروں کو آن لائن ٹرانسپورٹیشن پرمٹ کے اجرا کی جدید سہولت فراہم کی گئی ہے، اور رجسٹرڈ تاجر ای بیز پورٹل کے ذریعے پرمٹ کی درخواست دائر کر سکتے ہیں۔
کائٹ فلائنگ ایکٹ کے تحت شہر بھر میں صرف ڈی سی کی منظور شدہ کمرشل جگہوں پر کاروبار اور اسٹوریج کی اجازت ہوگی۔ دھاتی ڈور اور ممنوعہ کیمیکل کے استعمال پر زیرو ٹالرنس پالیسی نافذ رہے گی، جبکہ پتنگوں پر مذہبی، سیاسی، شخصی یا ملکی پرچم جیسی تصاویر ہرگز نہیں ہونی چاہئیں۔
صرف منظور شدہ جگہوں پر لاہور کے تاجروں کو ممنوعہ سامان کی غیر موجودگی کا حلفی بیان جمع کروانا ہوگا، اور دوسرے اضلاع سے سامان لانے کے لیے پیشگی ٹرانسپورٹیشن اجازت نامہ حاصل کرنا ضروری ہوگا۔
ڈپٹی کمشنر لاہور کا کہنا ہے کہ کائٹ فلائنگ ایکٹ 2025 پر مکمل عملدرآمد سے محفوظ اور پر امن تفریح یقینی بنائی جا رہی ہے، اور قانونی دائرہ کار میں رہنے والے رجسٹرڈ تاجروں کو تمام سہولیات فراہم کی جائیں گی۔
تازہ ترین خبروں کے لیے پی این آئی کا فیس بک پیج فالو کریں
