پنجاب میں سرکاری بھرتیوں کے طریقہ کار میں بڑی تبدیلی کی تیاری
پنجاب میں سرکاری بھرتیوں کے طریقہ کار میں بڑی تبدیلی کی تیاری شروع کر دی گئی ہے۔ ذرائع کے مطابق ابتدائی تقرریاں اب بنیادی پے اسکیل کے بجائے لمپ سم پے پیکج پر کرنے کی تجویز زیر غور ہے، جس کے لیے موجودہ سروس رولز کے بجائے امیدواروں کی اہلیت کے معیار کو مدنظر رکھا جائے گا۔
ذرائع کا کہنا ہے کہ مجوزہ ترمیم کے بعد صوبائی محکموں میں رکی ہوئی بھرتیوں کا عمل تیز ہونے کی توقع ہے اور منظوری کے بعد لمپ سم پے پیکج پر نئی آسامیوں کی راہ ہموار ہو جائے گی۔ لمپ سم پے پیکج پر پابندی میں نرمی کے کیسز حکومت کو کیس ٹو کیس بنیاد پر پیش کیے جائیں گے۔
حکومت کی منظوری کے بعد صوبے میں روایتی طریقہ کار کے بجائے لمپ سم بنیادوں پر بھرتیاں ممکن ہوں گی، تاہم گریڈ 5 اور اس سے اوپر کی بھرتیاں پنجاب پبلک سروس کمیشن (پی پی ایس سی) کے ذریعے روایتی طریقے سے جاری رہیں گی، اور پابندی میں نرمی کے کیسز متعلقہ فورمز پر دیکھے جائیں گے۔
مجوزہ منصوبے کے تحت گریڈ 1 سے گریڈ 4 تک لمپ سم پے پیکج کے تحت بھرتیوں کی اجازت دی جائے گی۔ اس کے ساتھ سروس رولز بنانے کے بجائے اہلیت کے معیار کے تحت بھرتیوں کا نیا راستہ کھولنے کی تجویز دی گئی ہے، جس سے سرکاری بھرتیوں کے عمل میں تیزی اور لچک لانے کی توقع ظاہر کی جا رہی ہے۔
تازہ ترین خبروں کے لیے پی این آئی کا فیس بک پیج فالو کریں
