لاہور میں بسنت کے موقع پر شہریوں کے لیے 6 فروری سے چار دن کی تعطیلات کا اعلان کر دیا گیا ہے۔ جمعرات، جمعہ، ہفتہ اور اتوار کو چھٹی ہوگی تاکہ شہری محفوظ اور پرامن انداز میں بسنت کی تقریبات میں حصہ لے سکیں۔
ذرائع کے مطابق 5 فروری کو چھٹی رکھنے کی تجویز دی گئی تھی، جس کے پیشِ نظر پنجاب حکومت نے 6 فروری کو بھی تعطیل کا اعلان کیا۔ اس فیصلے کے بعد لاہور میں بسنت کے دوران چار روزہ چھٹیاں بن گئی ہیں، جس سے شہری طویل ویک اینڈ کا لطف اٹھا سکیں گے۔
ڈی سی لاہور نے شہریوں کو ہدایت کی کہ 18 سال سے کم عمر بچے اپنے اہلِ خانہ کے ساتھ بسنت منائیں تاکہ جشن کے دوران نظم و ضبط اور تحفظ برقرار رہے۔ حکومت اور متعلقہ ادارے شہریوں کی حفاظت کو یقینی بنائیں گے۔
پولیس نے لاہور کو ریڈ، یلو اور گرین زون میں تقسیم کیا ہے۔ حساس اور گنجان آباد علاقوں کو ریڈ زون قرار دیا گیا ہے جہاں سخت پابندیاں نافذ ہوں گی، نسبتاً کم خطرناک علاقوں کو یلو اور محفوظ علاقوں کو گرین زون میں شامل کیا گیا ہے۔
بسنت کے دوران نگرانی کے لیے جدید ٹیکنالوجی استعمال کی جائے گی، جس میں ڈرون کیمرے، سوشل میڈیا مانیٹرنگ اور خصوصی کنٹرول رومز شامل ہیں۔ چھتوں پر شراب نوشی، ہوائی فائرنگ اور دیگر غیر قانونی سرگرمیوں میں ملوث افراد کے خلاف فوری کارروائی کی جائے گی۔
تازہ ترین خبروں کے لیے پی این آئی کا فیس بک پیج فالو کریں
