تھانہ جلوزئی کے علاقے برہ شاہ کوٹ میں کوئلے کی کان کے اندر اچانک دھماکا ہوا، جس کے نتیجے میں وہاں کام کرنے والے 6 مزدور شدید زخمی ہوگئے۔ پولیس کی ابتدائی اطلاعات کے مطابق دھماکا اس وقت ہوا جب مزدور کان کی گہرائی میں اپنے فرائض سرانجام دے رہے تھے۔
زخمی ہونے والے مزدوروں کی شناخت شاہ وزیر، آیاز، غنی الرحمٰن، حکیم خان، وزیر اور عبد الرحمٰن کے ناموں سے ہوئی ہے۔ حادثے کے فوری بعد مقامی افراد اور امدادی ٹیموں نے کارروائی کرتے ہوئے تمام زخمیوں کو ملبے سے نکالا اور طبی امداد کے لیے پشاور کے اسپتال منتقل کر دیا ہے۔
پولیس حکام کا کہنا ہے کہ واقعے کی وجوہات جاننے کے لیے تحقیقات شروع کر دی گئی ہیں تاکہ معلوم ہو سکے کہ دھماکا گیس بھرنے کی وجہ سے ہوا یا کسی اور تکنیکی خرابی کے باعث۔ کان میں حفاظتی انتظامات کا بھی جائزہ لیا جا رہا ہے تاکہ مستقبل میں ایسے حادثات سے بچا جا سکے۔
تازہ ترین خبروں کے لیے پی این آئی کا فیس بک پیج فالو کریں
