لاہور: وزیراعلیٰ پنجاب مریم نواز نے یکم جنوری سے مساجد کے آئمہ کرام کو اعزازیہ کی ادائیگی کا حکم دے دیا ہے۔
وزیراعلیٰ پنجاب کی صدارت میں ہونے والے اجلاس میں اعزازیہ کارڈ برائے امام مسجد صاحب کی منظوری دی گئی اور فروری 2026 تک کارڈ کے اجراء کی ڈیڈ لائن مقرر کی گئی۔ پہلی مرتبہ پے آرڈر کے ذریعے ادائیگی کی جائے گی جبکہ یکم فروری سے اعزازیہ کارڈ کے ذریعے ادائیگی کا سلسلہ شروع ہوگا۔
وزیراعلیٰ نے ہدایت دی کہ آئمہ کرام کی رجسٹریشن کا عمل مسلسل جاری رکھا جائے۔ پنجاب بھر سے 62 ہزار 994 رجسٹریشن فارم وصول ہوئے ہیں جن کی تصدیق کا عمل جاری ہے۔ مریم نواز نے کہا کہ ملک و قوم کے مفادات کے خلاف یا اخلاقی و مالی جرائم میں ملوث امام مسجد کا اعزازیہ بند کر دیا جائے گا۔
صوبے بھر میں مسجد مینجمنٹ کمیٹیاں اور تحصیل مینجمنٹ کمیٹیاں قائم کی گئی ہیں۔ اسسٹنٹ کمشنرز کو ہر ماہ آئمہ کرام کو مدعو کرکے میٹنگ کرنے کی ہدایت دی گئی ہے، اور حساس علاقوں میں کومبنگ آپریشن جاری رکھنے کے احکامات بھی دیے گئے۔
مزید براں، وزیراعلیٰ نے فورتھ شیڈول جرائم پیشہ افراد کی ڈیجیٹل نگرانی کے اقدامات اور غیر قانونی مقیم افغان باشندوں کے خلاف آپریشن مسلسل جاری رکھنے کے احکامات جاری کیے۔
تازہ ترین خبروں کے لیے پی این آئی کا فیس بک پیج فالو کریں
