ملک گیر احتجاج کا اعلان

لاہور (پی این آئی) ڈیلی ویجز ملازمین کی برطرفی کے خلاف یوٹیلیٹی سٹورز یونین نے آج 17 فروری کو ملک گیر احتجاج کا اعلان کر دیا۔

اسلام آباد ہیڈ آفس بلیو ایریا کے سامنے دن 2 بجے احتجاج ہوگا، ملک بھر کے پریس کلبز کے سامنے بھی مظاہرے کیے جائیں گے، وفاقی دارالحکومت میں دھرنے کا امکان ہے، مطالبات کی منظوری تک احتجاج جاری رہے گا۔اس حوالے سے یونین عہدیداران کا کہنا ہے کہ برطرفی کا فیصلہ واپس نہ لیا گیا تو آئندہ کا لائحہ عمل دیا جائے گا، احتجاج شدت اختیار کرسکتا ہے اور ملک بھر میں سٹورز بند کرنے کی وارننگ بھی دے دی گئی۔ سیکرٹری جنرل نیشنل ورکرز یونین راجہ مسکین نے کہا کہ ڈیلی ویجز کے بعداگلی باری ادارے کے کنٹرکٹ اور مستقل ملازمین کی ہوگی، برطرفیوں کے خلاف این آئی آر سی کے لیے کیس تیار کررہے ہیں، برطرفیوں کے خلاف حکم امتناع کے لیے بھی پیر کو رجوع کریں گے۔

جنرل سیکرٹری الائنس یونین عارف شاہ نے کہا کہ ایک ڈیلی ویجرجنید قریشی نیدلبرداشتہ ہوکرخودکشی کرلی،ہم اس کی ایف آئی آر حکومت اور انتظامیہ کیخلاف درج کرانے کی کوشش گے۔ واضح رہے کہ گزشتہ روز حکومت نے ملک بھر میں یوٹیلیٹی اسٹورز کارپوریشن (یو ایس سی) کے 2500 سے 2600 ڈیلی ویجز ملازمین کو نکالنے کا فیصلہ کیا تھا، ذرائع کا کہنا ہے کہ یو ایس سی بورڈ آف ڈائریکٹرز نے پہلے ہی ان ملازمین کو نکالنے کی منظوری دے دی تھی اور اب متعلقہ زونز کو اس پر عملدرآمد کے احکامات جاری کر دیئے گئے ہیں، یہ اقدام حکومتی ’’رائٹ سائزنگ پالیسی‘‘کے تحت کیا جا رہا ہے جس کا مقصد اداروں میں غیر مستقل ملازمین کی تعداد کم کرنا ہے، اس پالیسی کے تحت ملک بھر کے یوٹیلیٹی سٹورز پر کام کرنے والے پچیس سے چھبیس سو ڈیلی ویجز ملازمین کو برطرف کیا جائے گا۔