لاہور (پی این آئی) وزیراعلی پنجاب مریم نواز نے کچے کے علاقوں میں چوکیوں پر ڈیوٹی کرنے والے اہلکاروں کے ہارڈ ایریا الائنس کی باضابطہ طور پر منظوری دے دی ہے۔
نجی ٹی وی آج نیوز نے پولیس ذرائع کے حوالے سے بتایا کہ پنجاب پولیس کی تاریخ میں پہلی بار کچے کے علاقوں میں ڈیوٹی انجام دینے والے اہلکاروں کے لیے خصوصی الاؤنس کی منظوری دی گئی ہے۔رپورٹ کے مطابق انسپکٹر، سب انسپکٹر اور اے ایس آئی کو 25 ہزار روپے ماہانہ ہارڈ ایریا الاؤنس ملے گا، جبکہ ہیڈ کانسٹیبل اور کانسٹیبل کو 20 ہزار روپے ماہانہ ہارڈ ایریا الاؤنس کی منظوری دی گئی ہے۔
اسی طرح کچے کے علاقے میں خدمات انجام دینے والے درجہ چہارم کے پولیس ملازمین کو ہر ماہ 18 ہزار روپے ہارڈ شپ الاؤنس کی مد میں دیے جائیں گے۔رحیم یار خان کے کچے کے علاقے میں تعینات 943 اور راجن پور کے 414 پولیس افسران و اہلکار ہارڈ ایریا الاؤنس سے مستفید ہوں گے، اس مقصد کے لیے مجموعی طور پر 33 کروڑ روپے سے زائد فنڈز کی منظوری دی گئی ہے۔وزیراعلیٰ پنجاب مریم نواز شریف کے اس اقدام سے کچے کے خطرناک ترین علاقے میں جان ہتھیلی پر رکھ کر فرائض انجام دینے والے پولیس اہلکاروں میں خوشی کی لہر دوڑ گئی ہے۔
تازہ ترین خبروں کے لیے پی این آئی کا فیس بک پیج فالو کریں
