الیکٹرک بائیکس طلباء کو کب ملیں گی ؟ پنجاب حکومت نے تاریخ بتا دی

لاہور(پی این آئی)الیکٹرک بائیکس طلباء کو کب ملیں گی ؟ پنجاب حکومت نے تاریخ بتا دی۔۔۔تفصیلات کے مطابق وزیراعلیٰ پنجاب مریم نواز شریف نے رواں سال 12 اپریل کو چیف منسٹر یوتھ انیشیٹو کے تحت طلبا و طالبات کے لیے 20 ہزار موٹر سائیکلوں کی فراہمی کے منصوبے کا اعلان کیا تھا۔وزیراعلیٰ پنجاب مریم نواز کے اس اقدام سے طلبا وطالبات آسان ماہانہ اقساط کے منصوبوں کے ذریعے موٹرسائیکلیں اور ای بائیکس حاصل کر سکتے ہیں، طلبا ماہانہ 11 ہزار 676 روپے ماہانہ قسط پر ای بائیک حاصل کرسکتے ہیں، جبکہ طالبات 7 ہزار 325 روپے ماہانہ قسط کی پیشکش سے فائدہ اٹھا سکتی ہیں۔شہری علاقوں میں کوٹہ 50/50 فیصد طلبا و طالبات کے لیے مختص ہوگا،

دیہی علاقوں میں 70 فیصد کوٹہ طلبا اور 30 فیصد طالبات کے لیے مختص کیا جائے گا۔اس سے قبل طلبا و طالبات میں ای بائیکس کی تقسیم کا عمل لاہور ہائیکورٹ نے رکوا دیا تھا، 11 مئی کو لاہور ہائیکورٹ کے جسٹس شاہد کریم نے اسموگ تدارک کے لیے دائر درخواستوں پر سماعت کے دوران طالب علموں میں الیکٹرک بائیکس کا عمل روکنے کا حکم دیا تھا کہ طالب علموں کو بائیکس دیں گے تو وہ ون ویلنگ کریں گے اور لڑکیوں کے تعلیمی اداروں کے باہر جائیں گے۔اب وزیر اعلی مریم نواز شریف نے پنجاب اسمبلی میں خطاب کرتے ہوئے طلبا و طالبات میں ای بائیکس تقسیم کرنے کی نئی تاریخ کا اعلان کیا ہے ، مریم نواز نے اپنے خطاب میں کہا کہ حکومت پنجاب 10 جولائی سے الیکٹرک موٹر سائیکلوں کی تقسیم کا آغاز کررہی ہے۔۔۔۔۔۔