صوبائی دارالحکومت کے تمام ہسپتالوں میں ایمرجنسی نافذ کرنے کا فیصلہ

کوئٹہ (پی این آئی) بلوچستان میں انتظامیہ نے محرم الحرام کے دوران کوئٹہ کے تمام اسپتالوں میں ایمرجنسی نافذ کرنےکا فیصلہ کیا ہے۔۔۔ اس حوالے سےایڈیشنل ڈپٹی کمشنر محمد انور کاکڑ کی زیر صدارت ڈسٹرکٹ ہیلتھ کمیٹی کا اجلاس ہوا جس میں کوئٹہ کے اسپتالوں میں ایمرجنسی نافذ کرنے اور ایمرجنسی صورتحال سے نمٹنے کے لیے تمام اسپتالوں میں ایک ایمرجنسی وارڈ بھی مخصوص کرنے کا فیصلہ کیا گیا ہے۔۔۔

رپورٹس کے مطابق اسپتالوں میں ڈاکٹروں اور طبی عملے سمیت تمام ملازمین کی چھٹیاں منسوخ کرتے ہوئے اپنی ڈیوٹی پر موجودگی یقینی بنانےکی ہدایت بھی کی گئی ہے۔۔۔ بتایا گیا ہے کہ شہر کے مخلتف مقامات پر 10 ایمبولینسز ہائی الرٹ رہیں گی جب کہ علمدار روڈ اور باچاخان چوک سمیت دیگر مقامات پرکیمپ بھی لگائے جائیں گے۔۔۔محرم کے دوران ٹراما سینٹر میں 24 گھنٹے ایمرجنسی نافذ رکھنے کا فیصلہ بھی کیا گیا جب کہ صوبائی ڈیزاسٹر مینجمنٹ اتھارٹی کی ایمبولنسز بھی ہائی الرٹ پر ہوں گی۔۔۔ یہ بھی طے کیا گیا ہے کہ شہر میں نصب تمام سی سی ٹی وی کیمرے درست حالت میں رکھے جائیں گے۔۔۔