کراچی (آئی این پی)سندھ کے وزیر اطلاعات اور ٹرانسپورٹ شرجیل انعام میمن نے کراچی کے شہریوں کے لیے 5 سال کے انتظار کے بعد اورنج لائن بس ریپڈ ٹرانسپورٹ (بی آر ٹی) بس سروس کا افتتاح کر دیا۔بس سروس اورنگی ٹائون سے بورڈ آفس چوک تک 3.88 کلومیٹر کے روٹ پر چلائی جائے گی، جسے مرحوم سماجی کارکن خراج عقیدت پیش کرنے کے لیے عبدالستار ایدھی لائن کا نام دیا گیا ہے۔افتتاحی تقریب سے خطاب کرتے ہوئے شرجیل انعام میمن کا کہنا تھا کہ 20 ائیر کنڈیشنڈ بسیں اس روٹ پر چلائی جائیں گی،
راستے میں 4 بس اسٹیشن اور ٹکٹ بوتھ ہوں گے۔ان کا کہنا تھا کہ 12 میٹر لمبی بس میں 90 مسافروں کے بیٹھنے کی گنجائش ہے، اور اس بس سروس سے تقریبا 50 ہزار رہاائشی فائدہ اٹھائیں گے۔شرجیل انعام میمن کا کہنا تھا کہ بس کا کرایہ 10 سے 20 روپے کے درمیان رکھا گیا ہے، مالی بحران اور پیٹرول کی بڑھتی ہوئی قیمت کو مدنظر رکھتے ہوئے ہم نے کرایے کو کم کر دیا ہے تاکہ عام آدمی اس سے فائدہ اٹھا سکیں۔
وزیر ٹرانسپورٹ نے اس منصوبے کو مکمل کرنے کی کوششیں کرنے پر پاکستان پیپلز پارٹی (پی پی پی)کے چیئرمین بلاول بھٹو زرداری اور وزیراعظم شہباز شریف کی تعریف کی۔ان کا کہنا تھا کہ انہوں نے کراچی کے عوام کی زندگی آسان بنانے کے لیے ایک اور منصوبہ لانے کا وعدہ کیا تھا۔ایدھی فانڈیشن کے سربراہ فیصل ایدھی، صوبائی وزرا ناصر حسین شاہ اور سعید غنی نے بھی افتتاحی تقریب میں شرکت کی۔قبل ازیں، شرجیل انعام میمن نے ٹوئٹ کی کہ سیلاب کی وجہ سے افتتاحی تقریب کو سادہ رکھا گیا ہے۔سابق وزیراعلیٰ سندھ سید قائم علی شاہ نے یہ منصوبہ جون 2016 میں اورنگی ٹان کے 50 ہزار رہائشیوں کی سہولت کے لیے شروع کیا تھا، اس منصوبے کو ایک سال کے اندر مکمل ہونا تھا۔۔۔۔
تازہ ترین خبروں کے لیے پی این آئی کا فیس بک پیج فالو کریں
