شاہ لطیف یونیورسٹی کی طالبہ کے اغواء کی کوشش، چیف جسٹس سندھ ہائیکورٹ نے نوٹس لے لیا

کراچی(آئی این پی)خیرپور میں یونیورسٹی طالبہ کو اغوا کرنے کی کوشش پر چیف جسٹس سندھ ہائی کورٹ نے نوٹس لے لیا ہے۔ جمعہ کو چیف جسٹس سندھ ہائیکورٹ احمد علی ایم شیخ نے منگل 28 دسمبر کو ڈپٹی کمشنر خیر پور اور ایس ایس پی خیرپور کو طلب کرلیا ہے، ساتھ ہی چیف جسٹس نے شاہ لطیف یونیورسٹی کے رجسٹرار کو بھی پیش ہونے کا حکم دیا ہے۔افسوسناک واقعے پر چیف جسٹس نے ڈسٹرکٹ اینڈ سیشن جج خیرپور سے بھی واقعہ کی علیحدہ رپورٹ طلب کرلی ہے۔

واضح رہے کہ گذشتہ روز رانی پور قومی شاہراہ پر سات سے زائد ملزمان نے اسلحہ کے زور پر یونیورسٹی بس کو روکا اور طالبہ کو اغوا کرنے کی کوشش کی، اس دوران طالبات نے مذاحمت کی تو انہیں بھی تشدد کا نشانہ بناتے ہوئے زخمی کرڈالا، جس کے نتیجے میں سات طالبہ زخمی ہوئی تھیں۔واقعے سے متعلق طالبہ خوشبو بھٹی نے بتایا کہ صفدر وسان زبردستی بس کو روک کر مسلح لڑکوں کے ساتھ سوار ہوا، ملزمان نے بس میں سوار طالبات کے ساتھ بدتمیزی کی اور مجھے اغوا کرنے کی کوشش کی۔طالبہ کے اغوا ا کی کوشش ور ساتھیوں کے زخمی ہونے کی اطلاع پر یونیورسٹی طلباء شدید مشتعل ہوئے اور انہوں نے رانی پور کے مقام پر قومی شاہراہ پر دھرنا دیا تھا۔احتجاجی طلبہ کا موقف تھا کہ فوری طور پر واقعے میں ملوث ملزمان کو گرفتار کیا جائے اور انہیں قرار واقعی سزا دی جائے جب ملزمان گرفتار نہیں ہونگے، ہمارا احتجاج جاری رہے گا۔۔۔۔