پاکستان تحریک انصاف کے ایک رہنما نے پاکستان پیپلز پارٹی میں شمولیت کا اعلان کر دیا ہے۔ پیپلز پارٹی خواتین ونگ کی صدر فریال تالپور سے پی ٹی آئی کراچی کے رہنما بلال منصور نے ملاقات کی، جس میں صوبائی وزیر سعید غنی، سہیل انور سیال اور ڈپٹی میئر سلمان مراد بھی موجود تھے۔
ملاقات کے دوران بلال منصور نے باضابطہ طور پر پیپلز پارٹی میں شمولیت اختیار کی۔ فریال تالپور نے بلال منصور کو پارٹی میں شامل ہونے پر خوش آمدید کہا اور نیک تمناؤں کا اظہار کیا۔
واضح رہے کہ اس سے قبل بھی پی ٹی آئی کو مختلف علاقوں میں سیاسی دھچکے کا سامنا رہا ہے۔ 9 دسمبر 2026 کو مظفرآباد میں پی ٹی آئی کے مرکزی رہنما اور سابق امیدوار اسمبلی سردار شاہنواز اختر نے اپنے سینکڑوں کارکنان کے ہمراہ مسلم لیگ (ن) میں شمولیت اختیار کی تھی۔ اس موقع پر سابق وزیر اعظم آزاد کشمیر راجہ فاروق حیدر نے سردار شاہنواز اختر کو ہار پہنا کر پارٹی میں خوش آمدید کہا تھا۔
تقریب سے خطاب کرتے ہوئے راجہ فاروق حیدر کا کہنا تھا کہ نواز شریف، شہباز شریف اور مریم نواز کی بہتر کارکردگی کے اثرات آزاد کشمیر تک محسوس کیے جا رہے ہیں۔ اس تقریب کے دوران پیپلز پارٹی اور پی ٹی آئی سے تعلق رکھنے والے متعدد کارکنان نے بھی مسلم لیگ (ن) میں شمولیت اختیار کی تھی۔
اس سے ایک روز قبل بھمبر آزاد کشمیر میں پاکستان تحریک انصاف کے تحصیل صدر طارق محمود نے بھی پارٹی چھوڑنے کا اعلان کیا تھا۔ پریس کانفرنس کے دوران طارق محمود کا کہنا تھا کہ جو پارٹی ملکی اداروں کے خلاف عزائم رکھتی ہو اس کا حصہ نہیں رہا جا سکتا، وطن اور پاک فوج سے بڑھ کر کچھ نہیں اور وہ ان کے شانہ بشانہ کھڑے ہیں۔
تازہ ترین خبروں کے لیے پی این آئی کا فیس بک پیج فالو کریں
