پی ٹی آئی رہنما اشتہاری قرار، گرفتار کرنے کا حکم

اسلام آباد کی ڈسٹرکٹ اینڈ سیشن کورٹ نے پاکستان تحریک انصاف (پی ٹی آئی) کے رہنما اور سابق معاونِ خصوصی شہزاد اکبر کو متعدد بار طلبی کے باوجود پیش نہ ہونے پر اشتہاری قرار دے دیا ہے۔ عدالت نے اس سلسلے میں تحریری حکم نامہ جاری کرتے ہوئے ان کے وارنٹِ گرفتاری بھی نکال دیے۔

عدالتی فیصلے میں کہا گیا ہے کہ شہزاد اکبر کے خلاف مقدمے کا چالان پہلے ہی جمع کرایا جا چکا ہے، مگر وہ عدالت میں مسلسل غیرحاضر رہے۔ شہزاد اکبر پر سوشل میڈیا پر متنازع بیانات دینے کے الزام میں جولائی 2025 میں این سی سی آئی اے نے مقدمہ درج کیا تھا۔ واضح رہے کہ پی ٹی آئی حکومت کے خاتمے کے بعد شہزاد اکبر برطانیہ چلے گئے تھے جہاں وہ شہریت بھی رکھتے ہیں۔ کچھ عرصہ قبل لندن میں ان پر تیزاب گردی کا واقعہ بھی پیش آیا تھا۔

پاکستانی حکومت نے شہزاد اکبر اور عادل راجہ کی برطانیہ سے حوالگی کا مطالبہ بھی کر رکھا ہے۔ وزیر داخلہ محسن نقوی نے حالیہ پریس کانفرنس میں کہا تھا کہ بیرون ملک رہ کر ریاست مخالف پروپیگنڈا کرنے والوں کو واپس لا کر قانون کے سامنے جواب دہ بنایا جائے گا۔