لاہور میں انسداد دہشت گردی عدالت کے جج منظر علی گل نے کوٹ لکھپت جیل میں رات دیر تک سماعت کے بعد تھانا شادمان اور جناح ہاؤس کے قریب پولیس گاڑیاں جلانے کے مقدمات کا ٹرائل مکمل کر لیا اور فیصلہ محفوظ کر لیا۔
دونوں مقدمات میں ملزمان کو عدالت میں موجود رہنے کی ہدایت دی گئی جبکہ فیصلے کا اعلان کچھ دیر بعد کیا جائے گا۔ پولیس گاڑیاں جلانے کے کیس میں ملزمان کے صفائی بیانات اور حتمی دلائل مکمل ہو چکے ہیں۔ جناح ہاؤس کے قریب گاڑیاں جلانے کے کیس میں 65 سرکاری گواہان نے شہادت ریکارڈ کرائی، 17 ملزمان پر ٹرائل ہوا، 7 اشتہاری قرار پائے اور ایک ملزم وفات پا چکا ہے۔ ملزمان میں شاہ محمود قریشی، ڈاکٹر یاسمین راشد اور عمر سرفراز چیمہ سمیت دیگر شامل ہیں۔
9 مئی کو تھانا شادمان جلانے کے کیس میں پولیس نے 41 ملزمان کے خلاف چالان پیش کیا، جن میں سے 25 کا ٹرائل ہوا، 15 اشتہاری قرار دیے گئے اور ایک وفات پا گیا۔ اس مقدمے میں 45 گواہان نے شہادت ریکارڈ کرائی۔ ملزمان میں شاہ محمود قریشی، ڈاکٹر یاسمین راشد، محمود الرشید، عمر سرفراز چیمہ، اعجاز چوہدری، عالیہ حمزہ اور صنم جاوید شامل ہیں۔
تازہ ترین خبروں کے لیے پی این آئی کا فیس بک پیج فالو کریں
