راولپنڈی میں انسداد دہشت گردی کی عدالت کے باہر میڈیا سے گفتگو کرتے ہوئے پاکستان تحریک انصاف کے بانی کی بہن علیمہ خان نے کہا کہ طلال چوہدری سے پوچھا جائے کہ عمران خان کے بچوں کو ویزا کیوں نہیں دیا جا رہا۔
انہوں نے بتایا کہ ایڈووکیٹ فیصل ملک کو ہدایت دی ہے کہ طلال چوہدری سے رابطہ کریں۔ علیمہ خان کا کہنا تھا کہ وزارت داخلہ نے اس معاملے سے لاتعلقی ظاہر کی ہے، جبکہ ایمبیسڈر نے کہا تھا کہ وزارت داخلہ سے اجازت لی جائے گی۔ ان کے مطابق بانی کے بیٹوں قاسم اور سلیمان کے ٹریکنگ نمبرز موجود ہیں، نائیکوپ بن چکا ہے مگر کارڈ گم ہو گیا، دونوں نے برطانوی پاسپورٹ پر ویزا کے لیے درخواست دی ہے۔ علیمہ خان نے کہا کہ حکومت سلیمان اور قاسم کو پاکستان آنے سے نہیں روک سکتی، ویزا کے لیے آج دوبارہ ایمبیسڈر سے رابطہ کریں گے، اور اگر ویزا نہ ملا تو مزید کوشش جاری رہے گی۔
انہوں نے مزید کہا کہ ویزا کے معاملے پر طلال چوہدری سے بھی رابطہ کریں گی اور درخواست کا ٹریکنگ نمبر انہیں فراہم کریں گی۔
تازہ ترین خبروں کے لیے پی این آئی کا فیس بک پیج فالو کریں
