کراچی میں بجلی ہے نہ گیس، ہر چیز مافیا کے قبضے میں ہے، اب سب کو سمجھ آگئی ہے کہ ٹوٹنے اور بکھرنے میں نقصان ہے، گورنر ٹیسوری میدان میں آ گئے

کراچی(آئی این پی)گورنر سندھ کامران ٹیسوری نے کہا ہے کہ اقتدار میں حصہ وہیں ملتا ہے جہاں طاقت ہوتی ہے ورنہ صرف بخشش ملتی ہے، کراچی شہر میں بجلی ہے نہ گیس ہے، ہر چیز مافیا کے قبضے میں ہے، کراچی کے شہریوں کے ساتھ مجرموں جیسا سلوک کیا جا رہا ہے۔کراچی میں فاروق ستار کے ہمراہ پریس کانفرنس کرتے ہوئے کامران ٹیسوری نے کہا کہ کراچی کے شہریوں کے دل زخمی ہیں، مرہم رکھنے والا کوئی نہیں، ہمیں خود اپنا حق حاصل کرنا ہوگا، کوئی مسیحا نہیں آئے گا، ایک موبائل کی خاطر بچوں کو ماں سے چھینا جا رہا ہے،

شہر میں سٹریٹ کرائمز بڑھ رہے ہیں، اب سب کو سمجھ آگئی ہے کہ ٹوٹنے اور بکھرنے میں نقصان ہے۔انہوں نے کہا کہ نیا سال شروع ہونے والا ہے، پریشانی کا سال ختم ہوا، کراچی سب کی خدمت کرتا ہے اور آج شہر ٹوٹ رہا ہے تو ہم کیوں بکھرے ہوئے ہیں، سمندرکے قریب رہتے ہیں مگرپانی کی ایک ایک بوند کو ترستے ہیں، نفرتیں ختم کروانے کے لئے سب کے پاس گیا، ہم سب نے مل کر شہر کی بہتری کے لئے کام کرنا ہے۔گورنر سندھ نے کہا کہ کراچی کے شہریوں سے مجرموں جیسا سلوک کیا جا رہا ہے، اتنے ظلم سہنے کے باوجود شہری اف نہیں کر رہے، کس کا انتظار ہے، کوئی نہیں آئے گا، کوئی مسیحا نہیں آئے گا، ہمیں خود ہی ایک دوسرے کا ہاتھ تھامنا ہے، فاروق ستار سے میرا تعلق ڈھکا چھپا نہیں، فاروق ستار، خالد مقبول صدیقی سمیت سبھی شہر کو خوشحال دیکھنا چاہتے ہیں۔کامران ٹیسوری کا کہنا تھا کہ بہت دیر ہو گئی، جس کے پاس گاڑی تھی وہ موٹرسایئکل پر آگیا ہے، لوگ اتنے مایوس ہو چکے ہیں کہ ووٹ نہیں دینا چاہتے، کراچی میں تعلیم، ہیلتھ کا نظام صفر اور نوکریاں نہیں ملتی، کراچی شہر میں بجلی ہے نہ گیس ہے، ہر چیز مافیا کے قبضے میں ہے، ہم نے غلطیوں سے اپنی طاقت کو کھو دیا ہے، کراچی والوں نے فیصلہ کرنا ہے کہ بخشش پر گزارہ کریں گے یا پھر اپنا حق چاہیے۔گورنر سندھ کامران ٹیسوری کا کہنا تھا کہ اقتدار میں حصہ وہیں ملتا ہے جہاں طاقت ہوتی ہے ورنہ صرف بخشش ملتی ہے۔