شہباز شریف کو بیرون ملک کیوں نہیں جانے دیا ؟ شہزاد اکبر نے بتادیا

اسلام آباد (آئی این پی)وزیراعظم عمران خان کے مشیر برائے احتساب و داخلہ مرزا شہزاد اکبر نے مسلم لیگ (ن)کے صدر و قومی اسمبلی میں قائد حزب اختلاف شہباز شریف کو بیرون ملک جانے سے روکنے کی وجہ بتادی۔ ہفتہ کو نجی ٹی وی سے گفتگو کرتے ہوئے شہزاد اکبر کا کہنا تھاکہ لاہور ہائیکورٹ نے شہباز شریف کا نام بلیک لسٹ سے نکالنے کا حکم دیا مگر شہباز شریف کا نام عبوری قومی شناختی فہرست یعنی پی این آئی ایل میں موجود ہے، اس لیے انھیں ملک سے باہر جانے نہیں دیا گیا۔شہزاد اکبر نے مسلم لیگ ن کے ارکان پر ایف آئی اے کے دفتر پر دھاوا بولنے کا بھی الزام عائد کیا اور کہا کہ ن لیگ والے بند دفتر میں درخواست پھینک کر آگئے ہیں۔مشیر داخلہ نے لاہور ہائیکورٹ کے فیصلے پر بھی تحفظات کا اظہار کیا اور کہاکہ ضمانت کے مقدمے میں ایسا فیصلہ نہیں دیا جا سکتا جس کا حتمی فیصلے پر اثر پڑ سکتا ہو۔واضح رہے کہ گزشتہ روز لاہور ہائیکورٹ نے اپوزیشن لیڈر شہباز شریف کو 8 ہفتوں کیلئے بیرون ملک جانے کی اجازت دی تھی تاہم آج انہیں ایف آئی نے لاہور ائیرپورٹ پر قطر جانے سے روک دیا تھا۔۔۔۔۔

سابق مشیر اطلاعات اجمل وزیر آڈیو ٹیپ انکوائری رپورٹ میں کیا سامنے آیا؟

پشاور (آئی این پی )سابق مشیر اطلاعات خیبرپختونخوا اجمل وزیر کی آڈیوٹیپ انکوائری کمیشن کی رپورٹ صوبائی حکومت موصول ہوگئی۔وزیراعلی خیبرپختونخوا کے معاون خصوصی کامران بنگش نے کہا ہے کہ انکوائری کمیشن کی سربراہی سابق سینئر بیورو کریٹ صاحبزادہ محمد سعید نے کی۔کامران بنگش کے مطابق انکوائری کمیشن میں سابق ایڈیشنل آئی جی طارق جاوید، سابق ڈسٹرکٹ اینڈ سیشن جج محمد بشیر شامل تھے۔اجمل وزیر کے حوالے سے انکوائری کمیشن نے سرکاری حکام، ایڈورٹائزگ ایجنسی اور دیگر متعلقہ لوگوں کے بیانات ریکارڈ کیے۔کامران بنگش کے مطابق انکوائری کمیشن نے آڈیوٹیپ، ایف آئی اے فارنزلیب میں تحقیقات کے لئے بجھوادی تھی۔کامران بنگش نے مزید کہا کہ فارنزک سائنس لیبارٹری آڈیو ٹیپ کی صداقت یا اجمل وزیرکے ساتھ کوئی نتیجہ خیز لنک کا تعین نہیں کرسکی۔وزیر اعلی خیبر پختونخوا نے اجمل وزیر کی حد تک اس تحقیقاتی رپورٹ کو فائل کرنے کی ہدایات کردی۔۔۔۔۔