لاہور ( این این آئی) صوبائی وزیر ہائر ایجوکیشن پنجاب یاسر ہمایوں اور مشیر اطلاعات پنجاب فردوس عاشق اعوان نے مشترکہ پریس کانفرنس کرتے ہوئے ایک مرتبہ پھر کرونا ایس او پیز کی خلاف ورزی کرتے ہوئے چہروں پرماسک نہ پہنے ،دونوں صوبائی وزراء کے عقب میں بیٹھے ہوئے سرکاری افسران بھی بغیر ماسک کے ہی موجود تھے۔ واضح رہے کہ اس سے قبل بھی مشیر اطلاعات پنجاب اور صوبائی وزیر تعلیم ڈاکٹر مرادراس نے مشترکہ پریس کانفرنس کرتے ہوئے کرونا ایس او پیز کو نظر انداز کئے رکھا تھا۔دریں اثنا وزیر اعلیٰ پنجاب کی معاون خصوصی برائے اطلاعات ڈاکٹر فردوس عاشق اعوان نے کہا ہے کہ پنجاب حکومت مولانا فضل الرحمان کی ویکسی نیشن کرنے کی منتظر ہے،مولانافضل الرحمن جاتی امراشاہی محل میں جعلی راجکماری کے سامنے حاضری ضرور دیں لیکن کورنا وائرس کی ویکسی نیشن کے لئے بزدار حکومت کے قائم کردہ ویکسی نیشن سینٹرز پر ضرور تشریف لائیں اور اپنی ویکسی نیشن کرائیں تاکہ آپ کورونا سے اور عوام آپ کے ہر قسم کے شر سے محفوظ رہیں۔ٹوئٹر پر جاری اپنے بیان میں انہوں نے کہا کہ کورونا خطرات کے پیش نظر پاکستان تحریک انصاف کی حکومت شہریوں کو کورونا ویکسین کی فراہمی کیلئے سرتوڑ کوشش کررہی ہے اور دوسری جانب مولانا فضل الرحمن اقتدار سے دوری اور پے در پے شکستوں کا غم دور کرنے میں مصروف بھاگ دوڑ کررہے ہیں۔
تازہ ترین خبروں کے لیے پی این آئی کا فیس بک پیج فالو کریں
