پاکستان دوسرے ملکوں کو بجلی فروخت کرے گا، اتنی بجلی کیسے پیدا ہوگی؟ فواد چوہدری نے بڑے منصوبے کا اعلان کر دیا

اسلام آباد(پی این آئی)پاکستان دوسرے ملکوں کو بجلی فروخت کرے گا، اتنی بجلی کیسے پیدا ہوگی؟ فواد چوہدری نے بڑے منصوبے کا اعلان کر دیا، وفاقی وزیر سائنس اینڈ ٹیکنالوجی فواد چوہدری نے کہا ہے کہ وہ وقت بھی آجائے گا جب ہم بجلی فروخت کریں گے۔نجی ٹی وی نیوز کی رپورٹ کے مطابق وفاقی وزیر سائنس

اینڈ ٹیکنالوجی فواد چوہدری نے میڈیا سے گفتگو کرتے ہوئے کہا کہ معیشت کی بہتری کے لیے بڑی جنگ لڑ رہے ہیں، ماضی میں باہر سے فیول منگوا کر بجلی بنائی گئی جو مہنگی پڑی، ہماری کوشش ہے کسی بھی طرح بجلی کو سستا کریں۔انہوں نے کہا کہ تمام قابل تجدید توانائی کے آلات پر ڈیوٹی ختم کردی گئی ہے، چینی کمپنی توانائی آلات کے لیے پاکستان میں مینوفیکچرنگ کرے گی۔فواد چوہدری نے کہا کہ کوشش ہے پہلے سولر اور پھر ونڈو پاور کو پاکستان میں استعمال کراسکیں، وہ وقت بھی آجائے گا جب ہم بجلی فروخت کریں گے۔سعودی عرب سے متعلق فواد چوہدری نے کہا کہ غلط فہمی ہے کہ پاکستان کے سعودی عرب سے تعلقات خراب ہیں، سعودی عرب سے ہمیشہ مذہبی رشتہ ہے اور تعلقات درست ہیں۔وفاقی وزیر نے کہا کہ سعودی عرب، متحدہ عرب امارات کے ساتھ ہمارے اقتصادی تعلقات بھی ہیں، دونوں ممالک کے ساتھ ہمارے اچھے تعلقات ہیں اور رہیں گے۔واضح رہے کہ چند روز قبل فواد چوہدری کا کہنا تھا کہ میڈ ان پاکستان کو بڑا برینڈ بنانے کا ارادہ کر لیا ہے،میڈ ان پاکستان میڈ ان چائناسے بڑا برینڈ بن سکتا ہے۔وفاقی وزیر کا کہنا تھا کہ چینی کمپنیاں پاکستان میں آ کر امریکا سے ٹریڈ کرسکتی ہیں،امریکا پاکستان کے ذریعے چین سے ٹریڈ کرسکتا ہے، آئندہ 5 سے 10 سال کا پلان تیار کر لیا ہے۔