گیس بند

کوئٹہ: سوئی سدرن گیس کمپنی (SSGC) نے شہر کے مختلف علاقوں میں عارضی گیس بندش کا اعلان کر دیا ہے۔ کمپنی کے مطابق مرمتی کام کے باعث آج صبح 11 بجے سے شام 5 بجے تک گیس کی فراہمی معطل رہے گی۔

اعلامیے میں بتایا گیا ہے کہ ایون سٹی، بی ایم سی اور کوئٹہ ایونیو میں گیس دستیاب نہیں ہوگی۔ اس کے علاوہ ریلوے ہاؤسنگ، فیصل ٹاؤن، فاطمہ جناح اسپتال، ہزارہ ٹاؤن، سلطان آباد اور بروری روڈ بھی متاثرہ علاقوں میں شامل ہیں۔ سوئی سدرن گیس کمپنی نے شہریوں سے تعاون کی اپیل کی ہے۔ دوسری جانب توانائی کے شعبے میں ایک مثبت پیش رفت سامنے آئی ہے۔ خیبر پختونخوا کے نشپا بلاک میں بڑی مقدار میں تیل اور گیس دریافت ہوئی ہے۔ یہ دریافت آئل اینڈ گیس ڈیولپمنٹ کمپنی لمیٹڈ (او جی ڈی سی ایل) نے کی ہے۔

او جی ڈی سی ایل کے مطابق براگزئی ایکس-1 کنویں سے یومیہ 2,280 بیرل خام تیل اور 5.6 ملین مکعب فٹ گیس کی پیداوار حاصل ہوئی ہے۔ کنویں کی ڈرلنگ 5,170 میٹر گہرائی تک مکمل کی گئی، جبکہ کنگریالی فارمیشن سے یہ نشپا بلاک کی پہلی ہائیڈروکاربن دریافت ہے۔ کمپنی کا کہنا ہے کہ نشپا بلاک میں او جی ڈی سی ایل 65 فیصد حصص کے ساتھ آپریٹر ہے، جبکہ پی پی ایل 30 فیصد اور جی ایچ پی ایل 5 فیصد کی شراکت دار ہیں۔ اس نئی دریافت سے نہ صرف قومی توانائی ذخائر میں اضافہ ہوگا بلکہ او جی ڈی سی ایل کے وسائل بھی مزید مستحکم ہوں گے۔