لاہور (پی این آئی) فی یونٹ قیمت 14 روپے بڑھانے کے بعد عوام پر ایک اور بجلی بم گرانے کی تیاریاں، فی یونٹ 3.23 روپے اضافی سرچارج لگا کر بجلی صارفین پر 335 ارب روپے کا مزید بوجھ ڈالنے کی درخواست کر دی گئی۔
تفصیلات کے مطابق عالمی مالیاتی فنڈز کے مطالبے پر بجلی کی قیمتوں میں مزید اضافے کی تیاری کر لی گئی۔ حکومت نے بجلی صارفین پر 335 ارب کا اضافی بوجھ ڈالنے کیلئے نیپرا میں درخواست دائر کر دی۔بجلی کی قیمت میں 3.23 روپے اضافی سرچارج لگانے کیلئے درخواست دائر کی گئی ہے، اضافی سرچارج آئندہ مالی سال سے لگایا جائے گا۔ درخواست میں جولائی سے 30 اکتوبر تک 300 یونٹ سے زائد والے صارفین پر 3 روپے 23 پیسے جبکہ زرعی ٹیوب ویلوں کے لیے 43 پیسے فی یونٹ سرچارج عائد کرنے کی استدعا کی گئی ہے۔نومبر2023 سے 3 روپے 23 پیسے فی یونٹ سرچارج عائد کرنے کی درخواست بھی کی گئی ہے۔
درخواست میں کہا گیا کہ 6 مارچ کو بجلی کی قیمتوں میں اضافہ ناکافی ہے، نیپرا کی جانب سے درخواست پر 16 مارچ کو سماعت کی جائے گی۔ بتایا گیا ہے کہ اضافی سرچارج کا اطلاق کے الیکٹرک صارفین پر بھی ہوگا۔ یہاں یہ واضح رہے کہ نیپرا نے گزشتہ ہفتے ہی ملک بھر کے صارفین کیلئے بجلی کی فی یونٹ قیمت میں 14 روپے سے زائد اضافے کی منظوری دی تھی۔ اس فیصلے کے تحت ملک بھر کے بجلی صارفین سے رواں سال اکتوبر تک کھربوں روپے اضافی وصول کیے جائیں گے۔
تازہ ترین خبروں کے لیے پی این آئی کا فیس بک پیج فالو کریں
