ملک بھر میں بجلی کے بلوں کی طباعت اور تقسیم کے نظام میں بڑی پیشرفت سامنے آئی ہے، جس کے تحت اب تمام بجلی تقسیم کار کمپنیوں (ڈسکوز) کے بل پاکستان پوسٹ کے ذریعے تقسیم کیے جائیں گے۔
ذرائع کے مطابق اس منصوبے کا آغاز آزمائشی بنیادوں پر کیا جا رہا ہے، جس کے پہلے مرحلے میں ہر ڈسکوز کے ایک سب ڈویژن میں پاکستان پوسٹ کا عملہ بجلی کے بل تقسیم کرے گا۔ اگر پائلٹ پراجیکٹ کامیاب رہا تو اس نظام کو مرحلہ وار پورے ملک میں نافذ کیا جائے گا۔
حکام کا کہنا ہے کہ آئندہ چھ ماہ کے دوران بجلی بلوں کی مکمل تقسیم کا نظام پاکستان پوسٹ کے سپرد کر دیا جائے گا، جبکہ منصوبے کے آخری مرحلے میں بلوں کی پرنٹنگ بھی پاکستان پوسٹ کے ذمے ہوگی۔
ذرائع کا مزید کہنا ہے کہ اس نظام پر مؤثر عملدرآمد کے لیے تمام ریجنل پوسٹ ماسٹر جنرلز کو پیشگی ہدایات جاری کر دی گئی ہیں تاکہ ان کا عملہ ضروری تیاریاں مکمل کر سکے۔ اس کے ساتھ ساتھ کراچی میں کے الیکٹرک کے ساتھ بھی بجلی بلوں کی تقسیم کے سلسلے میں مذاکرات جاری ہیں۔
یہ اقدام حکومت کی جانب سے بلوں کی بروقت فراہمی، شفافیت کو یقینی بنانے اور اخراجات میں کمی لانے کے لیے ایک اہم اصلاحاتی قدم تصور کیا جا رہا ہے۔
تازہ ترین خبروں کے لیے پی این آئی کا فیس بک پیج فالو کریں
