عوام کے لیے بری خبر، گھی کی قلت کا خدشہ، ملز بند کرنے کی دھمکی

پاکستان بناسپتی مینوفیکچررز ایسوسی ایشن نے خبردار کیا ہے

کہ اگر حکومت نے ان کے مطالبات منظور نہ کیے تو جمعے کے بعد ملک بھر کی گھی ملز غیرمعینہ مدت کے لیے بند کر دی جائیں گی۔ ایسوسی ایشن کے صدر شیخ عمر ریحان نے واضح کیا ہے کہ یہ ہڑتال ایک دن کی نہیں بلکہ غیرمعینہ مدت کی ہوگی، اور مذاکرات ناکام ہونے کی صورت میں ملک بھر میں گھی اور آئل کی فراہمی مکمل طور پر روک دی جائے گی۔

شیخ عمر ریحان کے مطابق فیڈرل بورڈ آف ریونیو (ایف بی آر) کی جانب سے گھی ملوں میں اہلکاروں کی تعیناتی نے انڈسٹری کو سخت دباؤ میں ڈال دیا ہے، جس سے کاروباری ماحول میں خوف کی کیفیت پیدا ہو چکی ہے۔ ان کا کہنا ہے کہ ایف بی آر کی جانب سے 37 اے، ڈیجیٹل انوائسز، اور بینکوں کے ذریعے دو لاکھ روپے سے زائد لین دین کی لازمی شرط صنعت کے لیے ناقابل قبول ہے۔

ایسوسی ایشن نے حکومت سے مطالبہ کیا ہے کہ ان شرائط کو فوری طور پر واپس لیا جائے اور کاروبار دوست پالیسی اختیار کی جائے۔ ان کا کہنا ہے کہ اگر گھی اور کوکنگ آئل کے شعبے میں کسی قسم کا تعطل پیدا ہوا تو نہ صرف مہنگائی میں اضافہ ہوگا بلکہ سپلائی چین بھی متاثر ہو گی، جس کے اثرات براہ راست عام صارفین تک پہنچیں گے۔