چینی کی قیمتوں میں اضافہ جاری، فی کلو کتنے کی ہو گئی؟

کراچی، پشاور، کوئٹہ سمیت ملک کے مختلف شہروں میں چینی کی قیمت میں اضافہ مسلسل جاری ہے اور عوام کو مہنگی چینی خریدنے پر مجبور ہونا پڑ رہا ہے۔

پشاور کے دکانداروں کے مطابق ریٹیل مارکیٹ میں چینی کی قیمت 190 سے بڑھ کر 200 روپے فی کلو تک پہنچ چکی ہے، جب کہ صرف دو ہفتے قبل یہ قیمت 180 روپے فی کلو تھی۔ شوگر ڈیلرز کا کہنا ہے کہ ہول سیل مارکیٹ میں چینی ایک روپے اضافے کے بعد 179 روپے فی کلو میں فروخت ہو رہی ہے، جو گزشتہ روز 178 روپے تھی۔کوئٹہ میں بھی صورتحال مختلف نہیں، جہاں ریٹیل میں چینی 186 سے 190 روپے فی کلو میں دستیاب ہے، جب کہ ہول سیل ریٹ میں یہ 183 روپے فی کلو فروخت ہو رہی ہے۔کراچی کی ہول سیل مارکیٹ میں چینی کی قیمت میں دو روپے کا اضافہ ہوا ہے، جس کے بعد نئی قیمت 180 روپے فی کلو ہو گئی ہے۔ ریٹیل سطح پر یہاں چینی 185 سے 200 روپے فی کلو کے درمیان فروخت ہو رہی ہے۔

ادھر وفاقی حکومت نے چینی کی قیمتوں پر قابو پانے کے لیے 5 لاکھ ٹن چینی درآمد کرنے کا فیصلہ کیا ہے اور اس کے لیے باقاعدہ ٹینڈر بھی جاری کر دیا گیا ہے۔ تاہم سابق نگراں وفاقی وزیر اور مسلم لیگ (ن) کے رہنما فواد حسن فواد نے اس فیصلے پر اعتراض کرتے ہوئے حکومت سے پالیسی پر نظرثانی کا مطالبہ کیا ہے۔