بھارتی اداکار مایور پٹیل کو مبینہ طور پر نشے کی حالت میں گاڑی چلانے اور خوفناک حادثے کے بعد گرفتار کر لیا گیا ہے۔
بھارتی میڈیا رپورٹس کے مطابق پولیس نے بنگلورو میں نشے کی حالت میں ڈرائیونگ کے الزام میں کنڑ اداکار مایور پٹیل کی فورچیونر گاڑی ضبط کر لی ہے۔
رپورٹس میں بتایا گیا ہے کہ اداکار کو بنگلورو میں دیر رات ڈرنک اینڈ ڈرائیو کیس کے بعد پولیس نے حراست میں لیا، جس کے نتیجے میں متعدد گاڑیاں آپس میں ٹکرا گئیں۔
حادثہ منگل کی رات تقریباً 10 بجے اولڈ ایئرپورٹ روڈ پر کمانڈو اسپتال سگنل کے قریب پیش آیا، جہاں اداکار اپنی فورچیونر ایس یو وی چلا رہے تھے۔
مایور پٹیل نے ٹریفک سگنل پر کھڑی ایک گاڑی کو ٹکر ماری، جس کے باعث چین ری ایکشن ہوا اور مزید چار گاڑیاں متاثر ہوئیں، جن میں دو سوئفٹ ڈزائر گاڑیاں اور ایک سرکاری گاڑی بھی شامل تھیں۔
رپورٹ کے مطابق ٹریفک پولیس فوری طور پر موقع پر پہنچی اور اداکار کا بریتھ الائزر ٹیسٹ کیا گیا، جس کا نتیجہ مثبت آیا اور شراب نوشی کی تصدیق ہوئی۔
ایک پولیس اہلکار نے بھارتی میڈیا کو بتایا کہ اداکار نشے کی حالت میں گاڑی چلا رہا تھا، جس کے باعث متعدد گاڑیوں کو نقصان پہنچا۔
حادثے کے بعد مبینہ طور پر مایور پٹیل نے متاثرہ گاڑیوں میں سے ایک کے مالک سے تلخ کلامی بھی کی، جس پر پولیس نے مداخلت کی۔
پولیس نے فورچیونر گاڑی ضبط کر لی جبکہ متاثرہ ڈرائیورز کی شکایات پر ہلاسورو ٹریفک پولیس اسٹیشن میں باقاعدہ مقدمہ درج کر لیا گیا ہے۔
واضح رہے کہ مایور پٹیل پروڈکشن اور ڈائریکشن کے شعبے میں بھی کام کر چکے ہیں، جبکہ وہ بطور گلوکار اور میوزک کمپوزر بھی خدمات انجام دے چکے ہیں۔
تازہ ترین خبروں کے لیے پی این آئی کا فیس بک پیج فالو کریں
