کیئر اسٹارمر کی تنقید کے بعد ٹرمپ کا بڑا یوٹرن

برطانوی وزیرِ اعظم سر کیئر اسٹارمر کی تنقید کے بعد امریکی صدر ڈونلڈ ٹرمپ نے افغانستان میں برطانوی فوجیوں کے بارے میں اپنے بیان میں ترمیم کر دی ہے۔

صدر ٹرمپ نے تازہ بیان میں کہا کہ برطانوی فوجی عظیم اور بہادر ہیں اور امریکا کے ساتھ ہمیشہ کھڑے رہے ہیں۔ انہوں نے بتایا کہ افغانستان میں جنگ کے دوران 457 برطانوی فوجی ہلاک یا شدید زخمی ہوئے اور وہ دنیا کے بہترین جنگجوؤں میں شامل ہیں۔ صدر ٹرمپ نے کہا کہ امریکا اور برطانیہ کے درمیان فوجی تعلق ایک مضبوط بندھن ہے جو کبھی ٹوٹ نہیں سکتا۔

صدر نے مزید کہا کہ امریکا برطانوی فوجیوں کے لیے عزت اور محبت رکھتا ہے اور آئندہ بھی یہ احترام برقرار رہے گا۔ انہوں نے برطانوی فوجیوں کی بہادری کی تعریف کرتے ہوئے کہا کہ ان کا کوئی ثانی نہیں، سوائے امریکا کے۔

واضح رہے کہ دو روز قبل صدر ٹرمپ نے کہا تھا کہ افغانستان میں طالبان کے خلاف جنگ کے دوران برطانوی فوجی فرنٹ لائن پر موجود نہیں تھے۔ اس بیان پر برطانوی وزیر اعظم نے سخت ردعمل دیا اور معافی کا مطالبہ کیا، جس کے بعد صدر ٹرمپ نے اپنا موقف تبدیل کیا۔