تھائی لینڈ کے دارالحکومت بنکاک سے ملک کے شمال مشرقی حصے کی جانب جا رہی ایک مسافر ٹرین ایک حادثے کا شکار ہو گئی، جس کے نتیجے میں کم از کم 22 افراد ہلاک اور 30 سے زائد زخمی ہو گئے ہیں۔
تھائی پولیس کے مطابق یہ واقعہ بدھ کی صبح صوبہ ناکھون راتچاسیما کے ضلع سکھیو میں پیش آیا، جو بنکاک سے تقریباً 230 کلومیٹر شمال مشرق میں واقع ہے۔
پولیس حکام کا کہنا ہے کہ حادثہ اس وقت پیش آیا جب ایک ہائی اسپیڈ ریل منصوبے پر کام کے دوران ایک تعمیراتی کرین اچانک منہدم ہو گئی اور گزرتی ہوئی ٹرین کے ایک ڈبے پر جا گری۔
کرین کے ٹکرانے سے ٹرین پٹڑی سے اتر گئی اور کچھ دیر کے لیے آگ بھی بھڑک اٹھی۔
پولیس کے مطابق آگ پر قابو پا لیا گیا ہے جبکہ امدادی کارروائیاں جاری ہیں۔ زخمیوں کو قریبی اسپتالوں میں منتقل کر دیا گیا ہے۔ حکام کا کہنا ہے کہ واقعے کی تحقیقات شروع کر دی گئی ہیں تاکہ حادثے کی وجوہات کا تعین کیا جا سکے۔
تازہ ترین خبروں کے لیے پی این آئی کا فیس بک پیج فالو کریں
