جکارتہ: انڈونیشیا کے تلاؤد جزیرے اور اس کے گردونواح میں شدید زلزلہ محسوس کیا گیا، جس کے باعث شہریوں میں خوف و ہراس پھیل گیا اور لوگ گھروں سے باہر نکل آئے۔ زلزلے کے فوراً بعد مقامی حکام نے متاثرہ علاقوں میں ہنگامی اقدامات شروع کر دیے ہیں۔
بین الاقوامی خبر رساں ادارے کے مطابق ابتدائی اطلاعات میں کسی جانی نقصان یا بڑے پیمانے پر تباہی کی تصدیق نہیں ہو سکی، تاہم ریسکیو اور امدادی ادارے صورتحال کا مسلسل جائزہ لے رہے ہیں اور متاثرہ علاقوں کی نگرانی جاری ہے۔ جرمن ریسرچ سینٹر فار جیو سائنسز (GFZ) کے مطابق زلزلہ تلاؤد جزائر کے ساحلی علاقے کے قریب آیا، جس کی شدت 6.8 ریکارڈ کی گئی جبکہ اس کی گہرائی 77 کلو میٹر تھی۔ دوسری جانب انڈونیشیا کے زلزلہ پیما مرکز نے زلزلے کی شدت 7.1 اور گہرائی 17 کلو میٹر بتائی ہے۔
حکام نے واضح کیا ہے کہ زلزلے کے بعد سونامی کا کوئی خطرہ نہیں، تاہم احتیاطی تدابیر کے طور پر سیکیورٹی اور امدادی ٹیموں کو الرٹ کر دیا گیا ہے تاکہ کسی بھی ہنگامی صورتحال سے نمٹا جا سکے۔
تازہ ترین خبروں کے لیے پی این آئی کا فیس بک پیج فالو کریں
