یمن کے معروف عالمِ دین شیخ ڈاکٹر علی محمد الثنانی قرآن پاک کی تدریس کے دوران اچانک انتقال کر گئے ہیں، ان کے آخری لمحات کی ویڈیو سوشل میڈیا پر وائرل ہو گئی ہے۔ وائرل ویڈیو میں دیکھا جا سکتا ہے کہ یمنی عالمِ دین صوبہ مآرب میں قرآن کی درس و تدریس میں مصروف تھے کہ اسی دوران اچانک ان کی آنکھیں بند ہوئیں اور وہ کرسی سے نیچے گر گئے۔
غیر ملکی میڈیا ذرائع کے مطابق شیخ ڈاکٹر علی الثنانی رمَیلہ کے علاقے میں واقع نورہ مسجد میں حفاظ قرآن کی نگرانی کے فرائض انجام دے رہے تھے۔ وہ معمول کے مطابق ایک طالب علم کی تلاوت توجہ سے سن رہے تھے اور ان کے ہاتھ میں قرآنِ مجید موجود تھا کہ اسی دوران ان کی روح قبض ہو گئی۔ ان کے انتقال سے صوبہ مآرب ایک ممتاز مذہبی اور تعلیمی شخصیت سے محروم ہو گیا ہے۔ مرحوم عالمِ دین نے اعلیٰ تعلیمی امتیاز کے ساتھ پی ایچ ڈی کی ڈگری حاصل کر رکھی تھی۔
تازہ ترین خبروں کے لیے پی این آئی کا فیس بک پیج فالو کریں
