ویب ڈیسک: مسجد نبویؐ کے معروف مؤذن شیخ فیصل نعمان انتقال کر گئے۔ ان کی وفات کی خبر سامنے آتے ہی عالمِ اسلام میں رنج و غم کی فضا قائم ہو گئی، جبکہ دنیا بھر سے علما، نمازیوں اور عقیدت مند مسلمانوں کی جانب سے ان کے لیے دعائے مغفرت کی جا رہی ہے۔
مرحوم کی نمازِ جنازہ منگل کے روز فجر کی نماز کے بعد مسجد نبویؐ میں ادا کی گئی، جس میں بڑی تعداد میں نمازیوں نے شرکت کی۔ بعد ازاں شیخ فیصل نعمان کو تاریخی جنت البقیع (بقیع الغرقد) میں سپردِ خاک کر دیا گیا۔
شیخ فیصل نعمان کو 1422 ہجری، 2001 عیسوی میں مسجد نبویؐ کا مؤذن مقرر کیا گیا تھا۔ انہوں نے 25 برس تک نہایت اخلاص، عاجزی اور عقیدت کے ساتھ اس مقدس ذمہ داری کو نبھایا اور 1422 ہجری سے 1447 ہجری تک مسلسل مسجدِ رسولؐ سے اذان دینے کے فرائض انجام دیتے رہے۔
وہ ایک ایسے معزز اور دینی خدمات انجام دینے والے خاندان سے تعلق رکھتے تھے جن کی اذان کی خدمت نسل در نسل مسجد نبویؐ سے وابستہ رہی۔ اس روحانی سلسلے کے ذریعے مسجدِ رسولؐ سے بلند ہونے والی اذان کی آواز طویل عرصے تک امتِ مسلمہ کے دلوں کو سکون اور خشوع عطا کرتی رہی۔
ان کی وفات پر مختلف مذہبی شخصیات، علما اور عام مسلمانوں نے گہرے دکھ اور افسوس کا اظہار کرتے ہوئے کہا کہ شیخ فیصل نعمان کی پرسوز آواز میں دی جانے والی اذان لاکھوں دلوں کو روحانی سکون بخشتی تھی۔ سوشل میڈیا پر بھی ان کے لیے دعاؤں اور تعزیتی پیغامات کا سلسلہ جاری ہے۔
شیخ فیصل نعمان ایک عظیم دینی خدمت انجام دے کر اس دنیا سے رخصت ہوئے۔ ان کی زندگی مسجد نبویؐ، اذان اور ذکرِ الٰہی سے جڑی ایک روشن مثال کے طور پر ہمیشہ یاد رکھی جائے گی۔ اللہ تعالیٰ مرحوم کو جنت الفردوس میں اعلیٰ مقام عطا فرمائے اور اہلِ خانہ کو صبرِ جمیل دے۔ آمین۔
تازہ ترین خبروں کے لیے پی این آئی کا فیس بک پیج فالو کریں
