ایلون مسک کے پاس کتنی دولت ہے؟ نیا ریکارڈ قائم

واشنگٹن: دنیا کے امیر ترین شخص اور ٹیسلا کے بانی ایلون مسک کی دولت کا حجم 750 ارب ڈالر سے تجاوز کر گیا ہے، جس کے بعد وہ یہ سنگ میل عبور کرنے والی دنیا کی پہلی شخصیت بن گئے ہیں۔

بین الاقوامی خبر رساں ادارے کی رپورٹ کے مطابق 16 دسمبر کو ایلون مسک کی دولت 600 ارب ڈالر تک پہنچ چکی تھی، تاہم امریکی عدالت کی جانب سے ٹیسلا میں ان کی تنخواہ 56 ارب ڈالر سے بڑھا کر 139 ارب ڈالر کرنے کے فیصلے کے بعد ان کی مجموعی دولت میں نمایاں اضافہ ہوا ہے۔

رپورٹس کے مطابق ایلون مسک کی دولت دنیا کے دیگر تین امیر ترین افراد کی مجموعی دولت سے بھی زیادہ ہو چکی ہے۔ لیری ایلیسن کی دولت 242.7 ارب ڈالر، لیری پیج کی دولت 252.6 ارب ڈالر اور جیف بیزوس کی دولت 239.4 ارب ڈالر بتائی گئی ہے، تاہم مسک کی دولت ان تینوں سے کہیں زیادہ ہے، جو بالترتیب دنیا کے دوسرے، تیسرے اور چوتھے امیر ترین افراد ہیں۔

یاد رہے کہ 2018 میں ٹیسلا نے ایلون مسک کے لیے 56 ارب ڈالر کا تنخواہی پیکیج منظور کیا تھا، جسے 2024 میں عدالت نے منسوخ کر دیا تھا، تاہم دسمبر 2025 میں ڈیلاور کی سپریم کورٹ نے اس پیکیج کو بحال کر دیا، جس کے بعد ان کی تنخواہ کا حجم بڑھ کر 139 ارب ڈالر ہو گیا۔

مسک کی تنخواہ میں اس بڑے اضافے کے بعد ان کی مجموعی دولت میں بھی غیر معمولی اضافہ ہوا ہے۔ اسپیس ایکس کی مالیت بھی 800 ارب ڈالر تک پہنچ چکی ہے، جس میں ایلون مسک کے پاس 42 فیصد حصص موجود ہیں۔