ترکی کے شہر استنبول میں پاک بحریہ کے دوسرے جنگی جہاز پی این ایس خیبر کی شمولیت کی تقریب منعقد ہوئی، جس میں ترک صدر رجب طیب اردوان نے خصوصی شرکت کی۔ پاکستان کے امیر البحر ایڈمرل نوید اشرف بھی اس موقع پر موجود تھے۔
صدر اردوان نے کہا کہ پاکستان اور ترکی کے درمیان مثالی برادرانہ تعلقات ہیں اور دفاعی شعبے میں تعاون مزید بڑھایا جانا چاہیے۔ ایڈمرل نوید اشرف نے استنبول نیول شپ یارڈ میں جہازوں کی تعمیر میں شراکت کی تعریف کرتے ہوئے دونوں ممالک کے دفاعی تعاون کی گہرائی کو سراہا۔
پی این ملگن (خیبر) جدید ٹیکنالوجی سے لیس بحری جہاز ہے۔ پاکستان اور ترکی کے درمیان چار جنگی جہازوں کے معاہدے کے تحت دو جہاز ترکی میں اور دو پاکستان میں تیار ہو رہے ہیں۔
وزیراعظم محمد شہباز شریف نے اس موقع پر پاک بحریہ اور تمام شراکت داروں کو مبارکباد دی ہے۔ انہوں نے کہا کہ یہ جہاز پاکستان کی سمندری سرحدوں کے تحفظ کو مزید مضبوط کرے گا اور دونوں ممالک کے درمیان دفاعی تعاون دیرینہ برادرانہ تعلقات کی عکاسی کرتا ہے۔
تازہ ترین خبروں کے لیے پی این آئی کا فیس بک پیج فالو کریں
