رمضان المبارک کا آغاز کب ؟ ممکنہ تاریخ سامنے آگئی

متحدہ عرب امارات میں فلکیاتی حسابات کے مطابق رمضان المبارک 2026 کا آغاز متوقع طور پر 19 فروری سے ہوگا، جبکہ رجب 1447 ہجری کا آغاز 21 دسمبر 2025 سے ہوگا۔

مصر کے نیشنل ریسرچ انسٹی ٹیوٹ آف ایسٹرانومی اینڈ جیو فزکس کے سربراہ ڈاکٹر طہ رباہ کے مطابق رجب کا نیا چاند 20 دسمبر کی صبح قاہرہ کے وقت 3 بج کر 45 منٹ پر پیدا ہوگا اور اسی روز اسے دیکھے جانے کے امکانات موجود ہیں۔ مکہ مکرمہ میں نئے چاند کو سورج غروب ہونے کے بعد تقریباً 14 منٹ تک جبکہ قاہرہ میں 10 منٹ تک دیکھا جا سکے گا۔ دیگر عرب اور اسلامی ممالک کے دارالحکومتوں میں چاند کی موجودگی 1 سے 26 منٹ کے درمیان متوقع ہے، جبکہ ترکی کے دارالحکومت انقرہ میں چاند سورج کے ساتھ ہی غروب ہو جائے گا۔

رمضان 2026 کے آغاز کے حوالے سے بتایا گیا ہے کہ متحدہ عرب امارات میں فلکیاتی حسابات کے مطابق 19 فروری ممکنہ آغاز کی تاریخ ہے، تاہم حتمی تاریخ 29 شعبان کو سعودی عرب میں چاند دیکھنے کے بعد طے کی جائے گی۔ رمضان کے ابتدائی دنوں میں روزے تقریباً 12 گھنٹے کے ہوں گے، جبکہ اختتامی دنوں میں یہ دورانیہ بڑھ کر 13 گھنٹے تک جا سکتا ہے۔