مراکش کے شہر فاس میں دو رہائشی عمارات کے منہدم ہونے سے کم از کم انیس افراد جاں بحق اور سولہ زخمی ہو گئے ہیں۔ ریاستی خبررساں ادارے کے مطابق حادثہ شمال مشرقی علاقے المستقبل میں پیش آیا، جہاں ایک دوسرے سے منسلک چار منزلہ دو عمارتیں اچانک زمین بوس ہو گئیں۔
مقامی حکام کا کہنا ہے کہ ان عمارتوں میں آٹھ خاندان مقیم تھے، جن میں سے اکثر ملبے تلے دب گئے۔ واقعے کے فوراً بعد ریسکیو ٹیموں، پولیس اور دیگر اداروں نے امدادی کارروائیاں شروع کر دیں۔
زخمیوں کو فاس کے مقامی اسپتال منتقل کر دیا گیا ہے، جبکہ علاقے میں سرچ آپریشن تاحال جاری ہے تاکہ مزید پھنسے ہوئے افراد کو بچایا جا سکے۔ حکام کے مطابق عمارتوں کے گرنے کی وجہ تاحال سامنے نہیں آ سکی ہے اور تحقیقات جاری ہیں۔
تازہ ترین خبروں کے لیے پی این آئی کا فیس بک پیج فالو کریں
