روسی وزارت دفاع کے مطابق ایک فوجی ٹرانسپورٹ طیارہ مرمت کے بعد کی گئی ٹیسٹ فلائٹ کے دوران گر کر تباہ ہو گیا۔ سرکاری خبر رساں ادارے تاس نے بتایا کہ حادثے کے وقت طیارے میں سات افراد سوار تھے اور ان کی حالت کے بارے میں تاحال کوئی معلومات نہیں مل سکیں۔
وزارت دفاع نے اپنے بیان میں کہا کہ آئیوانوو ریجن میں مرمت کے بعد کی گئی ٹیسٹ فلائٹ کے دوران اے این-22 ملٹری ٹرانسپورٹ طیارہ گر کر تباہ ہو گیا۔ بیان کے مطابق طیارہ ایک غیر آباد علاقے میں گرا۔ آئیوانوو کا علاقہ ماسکو کے مشرق میں تقریباً دو سو کلومیٹر کے فاصلے پر واقع ہے۔
وزارت دفاع نے مزید بتایا کہ سرچ اینڈ ریسکیو ٹیمیں موقع پر بھیج دی گئی ہیں، جبکہ حادثے کی تحقیقات بھی شروع کر دی گئی ہیں۔ خبررساں ایجنسی کے مطابق روس کے یوکرین کے خلاف جاری حملے یا کیف کے کسی ممکنہ کردار کے حوالے سے اس حادثے کا کوئی تعلق ظاہر نہیں کیا گیا۔
تازہ ترین خبروں کے لیے پی این آئی کا فیس بک پیج فالو کریں
