پاکستان اور مصر کے وزرائے خارجہ نے معیشت، دفاع اور دیگر شعبوں میں تعاون بڑھانے پر اتفاق کیا
اسلام آباد میں وفود کی سطح پر ملاقات کے بعد مشترکہ پریس کانفرنس میں وزیرِ خارجہ اسحاق ڈار نے مصری وزیر خارجہ کے دورے کو پاکستان اور مصر کے تاریخی و برادرانہ تعلقات کو مضبوط کرنے میں اہم قرار دیا۔ اسحاق ڈار نے کہا کہ دونوں ممالک کے درمیان دیرینہ شراکت داری قائم ہے اور سکیورٹی سمیت مختلف شعبوں میں تعاون فروغ پا رہا ہے۔
وزیر خارجہ نے بتایا کہ مصری وزیر خارجہ کے دورے کے دوران سیاسی، معاشی، دفاعی، ثقافتی اور عوامی روابط میں تعاون بڑھانے پر اتفاق ہوا، اور پاکستان نے مصر کو 250 بزنس ہاؤسز کی فہرست فراہم کرنے کا فیصلہ کیا تاکہ سرمایہ کاری کے نئے مواقع تلاش کیے جا سکیں۔
مصری وزیر خارجہ نے پاکستان کی میزبانی کو سراہا اور کہا کہ دونوں ممالک خوشگوار اور برادرانہ تعلقات کو مزید وسعت دینے کے لیے پرعزم ہیں۔ انہوں نے اسلام آباد اور پشاور میں حالیہ دہشتگرد حملوں کی مذمت کی اور جانی نقصان پر افسوس کا اظہار کیا۔
دونوں وزرائے خارجہ نے مقبوضہ کشمیر، افغانستان اور دیگر عالمی امور پر بھی تبادلۂ خیال کیا اور کثیر الجہتی فورمز پر تعاون جاری رکھنے کے عزم کا اظہار کیا۔
تازہ ترین خبروں کے لیے پی این آئی کا فیس بک پیج فالو کریں
