سمندری طوفان دتوا کی جنوبی بھارت تک آمد سے پہلے ہی کئی علاقوں میں طوفانی بارشیں شروع ہو گئی ہیں اور اس خطرناک طوفان کے باعث جنوبی بھارت میں خوف و ہراس پھیل گیا ہے۔ طوفان سے بچوں کو محفوظ رکھنے کے لیے اسکول، یونیورسٹیاں اور کالج بند کر دیے گئے ہیں۔ بھارت کے محکمہ موسمیات نے تمل ناڈو اور پڈوچیری کے لیے اورنج الرٹ جاری کیا ہوا ہے۔
بھارتی میڈیا کے مطابق تمل ناڈو میں این ڈی آر ایف کی ٹیمیں تعینات کر دی گئی ہیں۔ سری لنکا کے ساحلی علاقوں اور خلیج بنگال کے جنوب مغربی حصوں میں اٹھنے والا یہ طوفان تمل ناڈو کے ساحلی علاقوں تک پہنچ چکا ہے۔
ناگاپٹنم میں ساحلوں پر اونچی لہریں، تیز ہوائیں اور تیز بارش کا سلسلہ جاری ہے۔ طوفان سات کلومیٹر فی گھنٹہ کی رفتار سے شمال کی جانب بڑھ رہا ہے اور محکمہ موسمیات نے ساحلی علاقوں کے لیے اورنج الرٹ برقرار رکھا ہے۔ ہفتہ رات ڈھائی بجے طوفان کا مرکز ترنکومالی سے 80 کلومیٹر شمال مغرب اور چنئی سے تقریباً 430 کلومیٹر جنوب میں تھا۔ توقع ہے کہ یہ طوفان مزید شمال مغرب کی جانب بڑھتے ہوئے 30 نومبر کو شمالی تمل ناڈو، پڈوچیری اور جنوبی آندھرا پردیش کے ساحلوں سے ٹکرا جائے گا۔
طوفان کے باعث تمل ناڈو کے کئی اضلاع میں بھاری سے بہت زیادہ بارش کی پیش گوئی کی گئی ہے۔ رامناتھ پورم، پڈوکوٹائی، تنجاور، تروارور، ناگاپٹنم اور کرائیکل میں شدید بارش کا امکان ہے جبکہ تھوتھکوڈی، شیوگنگئی، آریالور اور مائیلا دوتھرائی سمیت کئی اضلاع میں بھی بہت زیادہ بارش کی پیش گوئی کی گئی ہے۔ کنیا کماری، مدورائی، ویردھونگر، تروچراپلی، پیرامبلور اور کڈالور میں بھی متعدد مقامات پر بارش ہو سکتی ہے۔
شدید موسم کے باعث مختلف اضلاع میں اسکول اور کالج بند کرنے کا اعلان کر دیا گیا ہے۔ آریالور، تروچی، تنجاور اور ولوپورم میں اسکول بند ہیں جبکہ کڈالور، تروارور، ناگاپٹنم، مائیلا دوتھرائی، کلا کوریچی، پڈوکوٹائی، پیرامبلور، پڈوچیری اور کرائیکل میں اسکولوں اور کالجوں میں چھٹی کر دی گئی ہے۔
انتظامیہ نے ساحلی علاقوں کے رہائشیوں کو محتاط رہنے کی ہدایت کی ہے اور ماہی گیروں کو سمندر میں داخل ہونے سے روک دیا گیا ہے۔ تیز ہواؤں اور بلند لہروں کے پیش نظر ریلیف اور ڈیزاسٹر مینجمنٹ کی ٹیمیں چوکنا ہیں۔
سری لنکا میں بھی طوفان دتوا نے تباہی مچائی ہے جہاں شدید بارشوں کے باعث زندگی مفلوج ہے۔ ماہی گیری مکمل طور پر بند ہے اور ساحلی علاقوں کے لوگ گھروں میں محصور ہو کر طوفان کے گزرنے کا انتظار کر رہے ہیں۔
تازہ ترین خبروں کے لیے پی این آئی کا فیس بک پیج فالو کریں
