المی کنسلٹنسی کمپنی کی تازہ رپورٹ کے مطابق متحدہ عرب امارات میں 2026 کے دوران ملازمین کی تنخواہوں میں اوسطاً 4.1 فیصد اضافہ متوقع ہے۔
رپورٹ کے مطابق اگرچہ یہ شرح 2025 میں 4.2 فیصد اضافے سے تھوڑی کم ہے، لیکن ماہرین کے مطابق یہ اضافہ اس بات کی نشاندہی کرتا ہے کہ کمپنیوں کے درمیان بہتر تنخواہیں دینے کی دوڑ جاری ہے، خاص طور پر اس وقت جب معاشی سرگرمیوں میں تیزی اور مہنگائی کا دباؤ بڑھ رہا ہے۔
متحدہ عرب امارات کی لیبر مارکیٹ مسلسل مضبوط ہو رہی ہے اور مختلف شعبوں میں آجر اپنی معاوضہ پالیسیوں پر نظرثانی کر رہے ہیں تاکہ بڑھتی ہوئی مسابقت کے ماحول میں ہنر مند افراد کو برقرار رکھا جا سکے۔ دبئی کی آبادی چار ملین تک پہنچ چکی ہے جبکہ متحدہ عرب امارات کی مجموعی آبادی 11.44 ملین ہو گئی ہے۔
رپورٹ میں کہا گیا ہے کہ انجینئرنگ، ٹیکنالوجی، لاجسٹکس، فنانس اور اکاؤنٹنگ جیسے خصوصی شعبوں میں ماہرین کی مانگ بلند ہے، جس کی وجہ ڈیجیٹل تبدیلی اور معیشت کی متنوع سمتوں میں ترقی ہے۔
کارن فیری کے ریجنل ڈائریکٹر وجے گاندھی کے مطابق اب متحدہ عرب امارات کی مارکیٹ میں معاوضے کی پالیسی طویل المدتی حکمت عملی کے تحت کی جاتی ہے، اور ادارے آئندہ پانچ برسوں میں درکار مہارتیں پیدا کرنے پر فوکس کر رہے ہیں، جس کے لیے جدید ریوارڈ اور ترقیاتی منصوبے ضروری ہیں۔
2026 میں بینکنگ، رئیل اسٹیٹ، آئل اینڈ گیس، انڈسٹریل اور ریٹیل سیکٹرز میں سب سے زیادہ تنخواہوں میں اضافہ متوقع ہے کیونکہ ان شعبوں میں بڑے پیمانے پر سرمایہ کاری اور نئے آپریشنل ماڈلز اپنائے جا رہے ہیں۔
تازہ ترین خبروں کے لیے پی این آئی کا فیس بک پیج فالو کریں
