امریکی صدر ٹرمپ کو عدالت سے زور کا جھٹکا

امریکا میں ایک فیڈرل جج نے امریکی صدر ڈونلڈ ٹرمپ کو واشنگٹن ڈی سی میں فوج تعینات کرنے سے عارضی طور پر روک دیا ہے۔

غیر ملکی ذرائع ابلاغ کے مطابق ڈسٹرکٹ جج جیا کوب نے فیصلے میں کہا کہ صدر ٹرمپ نے مقامی حکام کے قانونی اختیارات، یعنی میئر کی اتھارٹی کو نظر انداز کیا ہے۔ تاہم یہ حکم فوری مؤثر نہیں ہے اور جج نے فیصلہ اکیس دن کے لیے موخر کیا ہے تاکہ انتظامیہ اپیل دائر کر سکے۔

یہ مقدمہ ڈی سی کے اٹارنی جنرل برایان شوالب نے دائر کیا تھا، ان کا موقف تھا کہ فوج کی تعیناتی شہر کی خودمختاری کو خطرے میں ڈال سکتی ہے۔ جج نے کہا کہ صدر کو وفاقی املاک کو تحفظ دینے کا اختیار حاصل ہے، لیکن وہ مقامی جرائم کنٹرول اور انفورسمنٹ کے کام میں یکطرفہ طور پر فوج استعمال نہیں کر سکتے۔

ادھر صدر ٹرمپ نے جیفری ایپسٹین سے متعلق مزید دستاویزات جاری کرنے کے بل پر دستخط بھی کر دیے ہیں۔ اس قانون کے تحت محکمہ انصاف کو ایپسٹین سے متعلق طویل عرصے سے جاری تحقیقات کی دستاویزات جاری کرنے کا حکم دیا گیا ہے۔

صدر ٹرمپ نے کہا کہ یہ اقدام شفافیت کی عکاسی کرتا ہے اور اب ڈیموکریٹس کی جیفری ایپسٹین کے ساتھ وابستگیوں کی حقیقت جلد سامنے آئے گی۔ بل پر دستخط کے بعد محکمہ انصاف ایپسٹین کی 20 ہزار سے زائد دستاویزات عوام کے لیے جاری کرے گا۔