واشنگٹن: امریکی صدر ڈونلڈ ٹرمپ نے بھارت کو تجارتی معاہدہ نہ کرنے کی صورت میں 25 فیصد ٹیکس عائد کرنے کی دھمکی دے دی۔
صحافیوں سے گفتگو کرتے ہوئے صدر ٹرمپ کا کہنا تھا کہ اگر بھارت نے امریکا کے ساتھ تجارتی معاہدہ نہ کیا تو اس کی مصنوعات پر 25 فیصد ٹیرف عائد کیا جائے گا۔ انہوں نے کہا کہ امریکا اور بھارت کے درمیان تاحال کوئی تجارتی معاہدہ طے نہیں پایا ہے۔ صدر ٹرمپ نے بھارت کو “اچھا دوست” قرار دیا، تاہم الزام عائد کیا کہ بھارت تقریباً تمام ممالک کے مقابلے میں زیادہ ٹیرف وصول کرتا ہے۔
یاد رہے کہ صدر ٹرمپ نے اپریل میں بھارتی مصنوعات پر 26 فیصد ٹیرف کے نفاذ کا اعلان کیا تھا، جس پر عملدرآمد جولائی تک مؤخر کر دیا گیا تھا۔ اس کے علاوہ، ٹرمپ نے ایپل کمپنی کو خبردار کیا تھا کہ اگر اس نے اپنے آئی فونز امریکا میں تیار نہ کیے تو اسے 25 فیصد ٹیرف کا سامنا کرنا پڑے گا۔ صدر ٹرمپ نے کار ساز کمپنی ٹیسلا کا مینوفیکچرنگ پلانٹ بھارت میں لگنے سے بھی روک دیا تھا۔
تازہ ترین خبروں کے لیے پی این آئی کا فیس بک پیج فالو کریں
