بھارت کی حکمراں جماعت بھارتیہ جنتا پارٹی کو مغربی ریاست گجرات کے ایک اسپتال میں نابینا مریضوں کو زبردستی پارٹی میں شامل کرنے پر شدید تنقید کا سامنا ہے۔
یہ واقعہ راج کوٹ شہر کے رنچھوڑ داس ٹرسٹ آئی ہاسپٹل کا ہے۔ جونا گڑھ سے تعلق رکھنے والے کملیش ٹھمار نے ویڈیو بناکر سوشل میڈیا پوسٹ پر پوسٹ کردی۔ ویڈیو میں بتایا گیا ہے کہ اسپتال میں داخل 350 مریضوں کو، جو سرجری کے منتظر تھے، جگاکر انہیں زبردستی بی جے پی کا رکن بنایا گیا۔
بھارتیہ جنتا پارٹی (گجرات) کے عہدیداروں نے اس بات کی تردید کی ہے کہ کسی کو اُس کی مرضی کے بغیر پارٹی کا رکن بنایا گیا ہے۔ ان کا کہنا ہے کہ پارٹی نے کسی بھی شخص کو رکنیت سازی کی ذمہ داری نہیں سونپی تھی۔ اگر کسی نے ایسا کیا ہے تو اپنی مرضی سے کیا ہے اور اُس سے جواب طلب کیا جائے گا۔
تازہ ترین خبروں کے لیے پی این آئی کا فیس بک پیج فالو کریں
