کرکٹر کی والدہ کی گھر سے گلا کٹی لاش برآمد

سابق بھارتی کرکٹر سلیل انکولا کی والدہ کی گھر سے گلا کٹی ہوئی لاش برآمد ہوئی ہے۔

بھارتی میڈیا کی رپورٹ کے مطابق سابق کرکٹر سلیل انکولا کی والدہ پونے کے فلیٹ میں مردہ حالت میں پائی گئیں۔پولیس کا کہنا ہے کہ سلیل انکولا کی والدہ جمعہ کے روز پونے میں اپنے فلیٹ میں مردہ حالت میں پائی گئی، ان کا گلا کٹا ہوا تھا اور زخم بظاہر ’خود سے لگائے ہوئے‘ معلوم ہوتے ہیں۔77 سالہ مالا اشوک انکولا کی لاش پر بھات روڈ کے علاقے میں ان کے فلیٹ سے دوپہر کے وقت ملی۔

پولیس اہلکار نے بتایا کہ یہ واقعہ اس وقت سامنے آیا جب ان کی ملازمہ فلیٹ پر کام کرنے کیلئے آئی اور دروازہ نہ کھلنے پر اس نے ان کے رشتہ داروں کو اطلاع دی۔پولیس نے بتایا کہ جب دروازہ کھولا گیا تو خاتون مردہ حالت میں پائی گئیں، ان کا گلا کٹا ہوا تھا، بظاہر لگتا ہے کہ زخم خود سے لگائے گئے ہیں، تاہم واقعے کی ہر پہلو سے تفتیش جاری ہے۔

حکام کا کہنا ہے کہ مالا انکولا کسی ذہنی بیماری میں مبتلا تھیں۔یاد رہے کہ سلیل انکولا نے بھارتی کرکٹ ٹیم کے لیجنڈ کرکٹر سچن ٹنڈولکر کے ساتھ نومبر 1989 میں ٹیسٹ ڈیبیو کیا تھا، جس میں انہوں نے صرف دو وکٹیں لی تھیں، مگر اس کے بعد وہ کوئی ٹیسٹ میچ نہیں کھیل سکے۔ وہ ون ڈے میں بھی ٹنڈولکر کے ساتھ ڈیبیو کرنے والے کھلاڑیوں میں شامل تھے تاہم بھارت کیلئے محض 20 میچز کھیل سکے اور 1998 میں 28 سال کی عمر میں کرکٹ سے ریٹائرمنٹ لینے کے بعد فلموں اور ڈراموں میں کام کرنے لگے تھے۔