بھاگتے چور کی لنگوٹی ہی سہی، طالبان نے امریکی فوج کی سینکڑوں گاڑیاں قبضے میں لے لیں

کابل (پی این آئی) طالبان نے امریکی فوج کیلئے تیار کردہ کروڑوں روپے مالیت کی جدید ترین ٹیکنالوجی سے لیس سینکڑوں گاڑیوں پر قبضہ کرلیا، طالبان فوجی گاڑیوں کو لوکل ٹرانسپورٹ کے طور پر استعمال کرنے لگے، تصاویر سوشل میڈیا پر وائرل ہو گئیں۔ تفصیلات کے مطابق افغانستان میں طالبان نے امریکی فورسز کے چھوڑے گئے ساز و سامان اور گولہ بارود پر قبضہ کرلیا۔غیر ملکی میڈیا کی رپورٹس کے مطابق طالبان نے امریکی افواج کی واپسی کے بعد چھوڑی گئی فورسز کی گاڑیوں اور بکتر بند گاڑیوں پر قبضہ کرلیا ہے۔طالبان گاڑیوں کو اِس کثیر تعداد کو لوکل ٹرانسپورٹ کے طور پر استعمال کرنے لگے۔ اس حوالے سے سوشل میڈیا پر وائرل ہونے والی تصاویر میں دیکھا جا سکتا ہےکہ متعدد شہری گاڑی پر سوار ہیں، تصاویر میں امریکی فوجی گاڑی Hamvee واضح دیکھی جا سکتی ہے۔میڈیا رپورٹس میں بتایا گیا ہے کہ سوشل میڈیا پر افغان طالبان کی کچھ تصاویر سامنے آنے کے بعد کی جانے والی تحقیقات میں یہ بات سامنے آئی ہے کہ طالبان نے گزشتہ ماہ جون میں 700 فوجی گاڑیوں کو قبضے میں لیا ہے جنہیں اب طالبان اپنی کارروائیوں کے لیے استعمال کریں گے۔میڈیا رپورٹس کے مطابق طالبان کی جانب سے جاری ایک ویڈیو میں یہ بھی دعویٰ کیا گیا ہیکہ انہوں نے افغان فورسز کے بھی متعدد ہتھیار قبضے میں لے رکھے ہیں۔غیر ملکی میڈیا کا بتاناہے کہ 30 جون تک کی جانیوالی تحقیقات میں یہ شواہد سامنے آئے کہ طالبان نے 715 عام گاڑیوں کو بھی تحویل میں لیا ہے جب کہ اس کے علاوہ بھی متعدد سازو سامان اور گولہ بارود قبضے میں لیے جانے کی اطلاعات ہیں جن کی طالبان نے فی الحال کوئی تصاویر یا ویڈیوز جاری نہیں کی ہیں۔اس حوالے سے طالبان کی مشتبہ تصاویر اور ویڈیوز میں دیکھا جاسکتا ہے کہ افغان طالبان ٹرکوں، توپوں اور بکتر بند گاڑیوں کے ساتھ موجود ہیں۔امریکی اور اتحاد افواج کے انخلا کے نتیجے میں گزشتہ روز امریکی فوج نے بگرام ائیربیس کو 20 سال بعد خالی کیا ہے جو اب باضابطہ افغان حکومت کے حوالے کردیا گیا ہے۔افغان حکام کے مطابق بگرام ائیربیس القاعدہ کے خلاف امریکی جنگ کا مرکز تھا۔