لندن منی لانڈرنگ کا گڑھ بن گیا، غیر قانونی پیسوں سےیہاں جائیدادیں خریدی جاتی ہیں، لندن کے میئر صادق خان پریشان ہو گئے

لندن(آئی این پی ) برطانوی دارالحکومت لندن منی لانڈرنگ کا گڑھ بن گیا ، برطانوی اپوزیشن لیڈر کیئر اسٹارمر اور میئر آف لندن صادق خان نے ترقی پذیر ممالک سے کرپشن کا پیسہ برطانیہ منتقل ہونے پر تشویش کا اظہار کیا ہے، میئر لندن صادق خان نے کہا ہے کہ غیر قانونی پیسوں سے لندن میں جائیدادیں خریدی جاتی ہیں اور دنیا بھر سے کالا دھن لندن لا کر سفید کیا جاتا ہے، کافی سالوں سے لندن منی لانڈرنگ کا کیپٹل بنا ہوا ہے۔ میئر لندن صادق خان نے نجی ٹی وی سے گفتگو کرتے ہوئے کہا ہمیں فکر ہے کہ کافی سالوں سے لندن منی لانڈرنگ کا کیپٹل ہے، غیر قانونی طریقے سے کمائے پیسے لندن منتقل کیے جاتے ہیں، میں لابنگ کر رہا ہوں کہ حکومت لندن کو منی لانڈرنگ کے لیے استعمال ہونے سے روکے۔ میئر کا کہنا تھا دنیا بھر سے کالا دھن لندن لا کر سفید کیا جا رہا ہے، لندن کے بینک، کاروبار، پراپرٹیز میں غیر قانونی پیسہ لگایا جاتا ہے، پولیس محنتی ہے مگر قانون میں بہت سارے سقم ہیں، حکومت پر زور دوں گا کہ قانون میں موجود سقم دور کریں۔ صادق خان نے کہا کئی ملٹی ملینرز غیر قانونی پیسہ لندن میں انویسٹ کر رہے ہیں، میں نہیں چاہتا کہ لندن غیر قانونی کاموں کے لیے استعمال ہوتا رہے، اگر آپ نے جائز طریقے سے پیسہ کمایا ہے تو ضرور لندن میں لگائیں۔ برطانوی اپوزیشن لیڈر کیئر روڈنی اسٹارمر نے کہا کہ منی لانڈرنگ روکنے کی لیے پولیسنگ میں بہتری ضروری ہے، کرپشن کو روکنا انتہائی ضروری ہے، ہم کرپشن اور منی لانڈرنگ روکنے میں کردار ادا کریں گے۔۔۔۔۔۔