بھارت میں کورونا کی بگڑتی صورت حال، پاکستان کی مدد کی پیشکش

اسلام آباد(آئی این پی) بھارت میں کورونا کی بگڑتی صورت حال پر پاکستان نے مدد کی پیشکش کردی۔ ہفتہ کو ترجمان دفتر خارجہ زاہد حفیظ چوہدری کی جانب سے جاری بیان کے مطابق انسانی ہمدردی کے تحت پاکستان نے بھارت کو مدد کی پیشکش کی ہے۔ترجمان دفتر خارجہ کے مطابق بھارت کو مدد کی پیشکش جذبہ خیرسگالی کے تحت کی گئی ہے، پاکستان نے بھارت کو ریلیف سپورٹ دینے کی پیشکش کی ہے۔ترجمان دفتر خارجہ کا کہنا ہے کہ بھارت کو وینٹی لیٹرز، بی آئی پی اے پی، ڈیجیٹل ایکسرے مشین اور دیگر اشیا دینے کی پیشکش کی گئی ہے۔قبل ازیں وزیراعظم عمران خان نے سماجی رابطے کی ویب سائٹ ٹوئٹر پر کورونا وبا میں بھارتی عوام سے اظہار یکجہتی کرتے ہوئے کہا تھا کہ بھارتی عوام کورونا کی خطرناک لہر کا سامنا کررہے ہیں، بھارت کیعوام سے اس مشکل وقت میں اظہاریکجہتی کرتے ہیں۔وزیراعظم کا کہنا تھا کہ بھارت سمیت دنیامیں کورونا متاثرین کی جلد صحت یابی کے لیے دعاگو ہوں، انسانیت کو بچانے کے لیے عالمی وبا سے مل کر لڑنا ہوگا۔اس سے قبل وزیرخارجہ شاہ محمود قریشی نے کورونا وبا کے تناظر میں بھارت سیاظہار ہمدردی کرتے ہوئے کہا تھا کہ کورونا وبا کے دوران بھارت کے عوام سے حمایت کااظہارکرتے ہیں، وبانے ہمارے خطے کو سخت نقصان پہنچا ہے، پاکستانی عوام کی طرف سے بھارتی متاثرہ خاندانوں سے ہمدردی کااظہارکرتاہوں۔