نیو یارک(آئی این پی ) امریکی عدالت نے پولیس کے ہاتھوں سیاہ فام شہری جارج فلائیڈ کی جان لیے جانے کے کیس میں سابق پولیس افسر پر فرد جرم عائد کردی۔ غیر ملکی میڈیا کے مطابق امریکی عدالت کے 12 ججوں پر مشتمل جیوری نے گزشتہ سال مینیاپولس میں پولیس کے ہاتھوں جان لیے جانے والے سیاہ فام شہری جارج فلائیڈ کے کیس کا فیصلہ سنایا جس میں مینیاپولس پولیس کے سابق افسر 45 سالہ سفید فام ڈیرک شاوین پر فرد جرم عائد کی گئی۔ میڈیا رپورٹس کے مطابق ڈیرک پر تین الزامات میں فرد جرم عائد کی گئی ہے۔ عدالت نے اپنے فیصلے میں سابق پولیس افسر کی ضمانت کو فوری طور پر منسوخ کردیا جس کے بعد اسے کمرہ عدالت سے ہی گرفتار کرلیا گیا۔ میڈیا رپورٹس میں بتایا گیا ہے کہ ڈیرک کو آئندہ 2 ماہ میں سزا سنائے جانے کا امکان ہے اور سابق پولیس افسر کو تقریبا 10 سال قید کی سزا دی جاسکتی ہے۔ امریکی عدالت کے ججوں نے تین ہفتے سے چلنے والے ٹرائل کا فیصلہ سنایا جب کہ عدالت کی جانب سے فیصلہ سنائے جانے کے بعد عدالت کے باہر جارج کے حامیوں نے خوشی کا اظہار کیا۔ جارج فلائیڈ کے اہلخانہ کے وکیل نے عدالتی فیصلے کو امریکی تاریخ کا ٹرننگ پوائنٹ قرار دیا ہے۔ دوسری جانب عدالتی فیصلے کے بعد امریکی صدرجوبائیڈن اور نائب صدر کمالا ہیرس نے جارج فلائیڈ کے اہلخانہ کو ٹیلیفون کیا۔ امریکی صدر کا عدالتی فیصلے پر کہنا تھا کہ کم از کم انصاف موجود ہے اور انہیں امید ہے کہ اس سے ایک معنی خیز تبدیلی کے لمحات جنم لیں گے۔۔۔۔۔
تازہ ترین خبروں کے لیے پی این آئی کا فیس بک پیج فالو کریں
