جینوا(این این آئی) عالمی ادارہ صحت کے سربراہ نے کہا ہے کہ صرف ویکسین سے کورونا وائرس وبا کے پھیلائوکو نہیں روکا جا سکے گا۔عالمی میڈیا کے مطابق عالمی ادارہ صحت کے ڈائریکٹر جنرل ٹیدروس ادھانوم غیبریسس نے پیر کو اپنے ایک بیان میں کہا کہ ویکسین وبا کو روکنے کے لیے کیے گئے اقدامات میں معاون
ضرور ہوگی تاہم اسے احتیاطی تدابیر کا متبادل قرار نہیں دیا جاسکتا۔ صرف کسی ویکسین سے وبا کا خاتمہ نہیں ہوگا۔انہوں نے کہا کہ ہفتے کے روز عالمی ادارہ صحت نے پوری دنیا میں 6 لاکھ 60 ہزار 905 کیسز ریکارڈ کیے جو کہ جمعے کو آنے والے تقریباً ساڑھے چھ لاکھ کیسز سے زائد یومیہ تعداد ہے۔ اس سے قبل 7 نومبر کو ایک دن میں 6 لاکھ 14 ہزار کیس ریکارڈ ہوئے تھے۔عالمی ادارہ صحت کے سربراہ نے کہا کہ ابتدا مین ویکسین کی فراہمی صرف طبی عملے، عمر رسیدہ اور آبادی کے ایسے افراد کو فراہم کی جائے گی جنھیں وبا سے زیادہ خطرات لاحق ہیں۔ امید ہے اس حکمت عملی سے اموات میں کمی آئے گی اور نظام صحت پر دبائو بھی کم ہوگا۔انہوں نے واضح کیا کہ ویکسین آنے کے باجود وائرس کے پھیلائو کے راستے کھلے رہیں گے۔ ہمیں ہوشیار رہنا ہوگا اور کورونا وائرس کے ٹیسٹ، ٹریسنگ اور متاثرہ افراد سے رابطے میں آنے والوں کی آئسولیشن کے طریقہ کار کو جاری رکھنا ہوگا۔۔۔۔
تازہ ترین خبروں کے لیے پی این آئی کا فیس بک پیج فالو کریں
