محکمہ موسمیات نے بارش اور پہاڑوں پر برف باری سے متعلق نیا الرٹ جاری کیا ہے، جس کے مطابق مغربی ہوا کا ایک کمزور سلسلہ آج رات سے کل تک ملک کے شمالی حصوں کو متاثر کرے گا۔
الرٹ میں بتایا گیا ہے کہ پانچ دسمبر کو شمالی علاقوں میں ہلکی بارش اور پہاڑوں پر برف باری کی توقع ہے۔ گلگت بلتستان، کشمیر اور خیبر پختونخوا کے بالائی علاقوں میں بارش اور برف باری کا امکان ہے، جبکہ دیر، چترال، سوات، کوہستان، شانگلہ اور بٹگرام میں بھی بارش اور برف باری ہو سکتی ہے۔ دیر، چترال اور سوات میں یہ سلسلہ پانچ دسمبر تک جاری رہنے کی پیش گوئی کی گئی ہے۔
ملک کے دیگر علاقوں میں موسم سرد اور خشک رہے گا۔ پنجاب اور خیبر پختونخوا کے میدانی علاقوں میں دھند اور اسموگ برقرار رہنے کا امکان ہے۔ لاہور، فیصل آباد، ملتان، ساہیوال، سیالکوٹ، نارووال اور گوجرانوالہ میں دھند متوقع ہے، جبکہ پشاور، مردان، صوابی اور ڈی آئی خان میں دھند کے باعث حدِ نگاہ متاثر ہو سکتی ہے۔
بابوسر اور ملحقہ علاقوں میں برف باری کے باعث سڑکوں پر پھسلن اور ممکنہ بندش کا خدشہ ظاہر کیا گیا ہے۔ بالائی علاقوں میں دن کے اوقات میں درجہ حرارت میں ایک سے تین ڈگری کمی کا امکان ہے۔
تازہ ترین خبروں کے لیے پی این آئی کا فیس بک پیج فالو کریں
